جی ایس پی پلس کا درجہ ملنے کے بعد چینی کمپنیاں پاکستان کے ٹیکسٹائل سیکٹر میں 2ارب ..
تازہ ترین : 1

جی ایس پی پلس کا درجہ ملنے کے بعد چینی کمپنیاں پاکستان کے ٹیکسٹائل سیکٹر میں 2ارب ڈالر کی سرمایہ کاری کر رہی ہیں‘ گورنر پنجاب ،تاجر برادری کی بدولت آج ملک کی معیشت میں نہ صرف اضافہ ہو رہا ہے بلکہ اس سے روزگار کے مواقع بھی پیدا ہو رہے ہیں،موجودہ حکومت تاجر برادری کے مسائل کے حل کے لئے ہر ممکن اقدامات کو بروئے کار لانے کی کوشش کر رہی ہے‘ چوہدری محمد سرور

لاہور (اُردو پوائنٹ اخبار تازہ ترین۔13 فروری ۔2014ء) گورنر پنجاب چوہدری محمد سرور نے کہا ہے کہ ملک میں گیس اور توانائی کے بحران کے باوجود بزنس کمیونٹی نے پوری محنت سے جس طرح ملکی معیشت کو سنبھالا دیئے ہوئے ہے یقینا قابل ستائش ہے ،تاجر برادری کی بدولت آج ملک کی معیشت میں نہ صرف اضافہ ہو رہا ہے بلکہ اس سے روزگار کے مواقع بھی پیدا ہو رہے ہیں،موجودہ حکومت تاجر برادری کے مسائل کے حل کے لئے ہر ممکن اقدامات کو بروئے کار لانے کی کوشش کر رہی ہے۔

ان خیالات کا اظہار انہوں نے جمعرات کے روز یہاں گورنر ہاؤس لاہور میں صدر لبرٹی مارکیٹ صفدر علی بٹ کی قیادت میں آئے ہوئے 50رُکنی وفد سے ملاقات کے دوران کیا۔ ملاقات میں لاہور کی مختلف مارکیٹوں کے صدور بھی شامل تھے۔ گورنر پنجاب نے کہا کہ تاجر برادری کو سہولتیں فراہم کرنا اور ان کے مسائل کو حل کرنا ہماری اولین ترجیح ہے اور موجودہ حکومت اس سلسلے میں ایک منصوبہ بندی کے تحت کام کر رہی ہے تاکہ بزنس کمیونٹی کو زیادہ سے زیادہ سہولیات فراہم کی جائیں۔

انہوں نے کہا کہ ملکی معیشت کے استحکام اور عوام کی خوشحالی کے لئے ہمیں مل کر کام کرنا ہوگا۔ انہوں نے مزید کہا کہ ملک اس وقت دہشت گردی جیسے سنگین مسائل سے دوچار ہے جن سے نمٹنے کے لئے قومی اتحاد اور یکجہتی کی ضرورت ہے ۔ گورنر نے کہا کہ جی ایس پی پلس سٹیٹس کا حصول پاکستان کا دیرینہ خواب تھا جو اب پورا ہو چکا ہے اور جی ایس پی پلس سٹیٹس ملنے سے ہماری برآمدات میں خاطر خواہ اضافہ ہوا ہے۔

اس موقع پر تاجر برادر ی کے وفد میں شامل مختلف مارکیٹوں کے صدور نے گورنر پنجاب کو انہیں درپیش مسائل کے بارے میں تفصیلا آگاہ کیا۔وفد نے گورنر کو یقین دلایا کہ تاجر برادری موجودہ حکومت کے شانہ بشانہ کھڑی ہے۔ گورنر پنجاب نے تمام مسائل کے سد باب کے لئے تاجر برادری کو اپنے مکمل تعاون کی یقین دہانی کرائی۔علاوہ ازیں وزیراعلیٰ نے لاہور چیمبر کا دورہ کیا ۔

گورنر پنجاب نے کہا کہ پاکستان کو جی ایس پی پلس کا درجہ ملنے کے بعد چینی کمپنیاں پاکستان کے ٹیکسٹائل سیکٹر میں 2ارب ڈالر کی سرمایہ کاری کر رہی ہیں جبکہ نجی شعبہ سے مل کر 50میگاواٹ کا پاور پلانٹس بھی لگائیں گی۔بعد ازاں گورنر پنجاب چوہدری محمد سرور سے گورنر ہاؤس لاہور میں سینئر کالمنسٹ حفیظ اللہ خاں نیازی کی قیادت میں 5رکنی وفد نے ملاقات کی۔

ملاقات میں مختلف ایشوز پر گفتگو ہوئی۔ اس موقع پر ممبر صوبائی اسمبلی نجیب اللہ خاں نیازی ،ممبر صوبائی اسمبلی غنضفر علی چھینہ کے علاوہ حافظ امیر علی عوان بھی ملاقات میں موجود تھے۔ گورنر پنجاب نے کہا کہ عوام کو تعلیم، صحت اور دیگر بنیادی سہولتوں کی فراہمی موجودہ حکومت کی اولین ترجیح ہے جن کے لئے پنجاب حکومت موٴثر حکمت عملی پرعمل پیرا ہے۔انہوں نے کہا کہ ہمیں تمام سیاسی وابستگیوں کو بالائے طاق رکھتے ہوئے عوام کی خدمت کے لئے مل جل کر کام کرنا ہوگا۔

مزید متعلقہ خبریں پڑھئیے‎ :

وقت اشاعت : 13/02/2014 - 20:55:31

متعلقہ عنوان :

اپنی رائے کا اظہار کریں