محکمہ پولیس کو ایس ایس یو کے معیارکے مطابق بنایا جائے

کراچی ۔ (اُردو پوائنٹ اخبارتازہ ترین - اے پی پی۔ 29 اپریل2017ء) کراچی یونیورسٹی کرمنالاجی ڈپارٹمنٹ کے طلباء نے کہا ہے کہ پورے محکمہ پولیس کو اسپیشل سیکیورٹی یونٹ سندھ پولیس کے معیار کے مطابق اور اسی طرز پر بہتربنایا جائے تاکہ ملک دشمن عناصر کے مذموم عزائم کو مؤثر طریقے سے ناکام بنایا جا سکے۔ ہفتہ کو جاری کردہ اعلامیہ کے مطابق ان خیالات کا اظہار کراچی یونیورسٹی کے ایم اے فائنل اور ایم اے پریویس کے 48 طلباء اور طالبات نے اسپیشل سیکیورٹی یونٹ ہیڈکوارٹر کے دورے کے دوران کیا۔

دورے کے دوران چیئرمین کرمنالاجی ڈپارٹمنٹ ڈاکٹر غلام محمد برفت اور دیگر اساتذہ بھی ان کے ہمراہ تھے۔ کمانڈنٹ ایس ایس یو مقصود احمد نے طلباء کو یونٹ کے افسران اور کمانڈوز کی پیشہ وارانہ صلاحیتوں خاص طور پر فراہم کی جانے والی جدید پیشہ وارانہ تربیت کے بارے میں آگاہ کیا۔

(جاری ہے)

دورے کے دوران طلباء کمانڈوز کے پیشہ وارنہ معیار اور دہشت گردوں سے مقابلہ کرنے کے سلسلے میں فراہم کی جانے والی پیشہ وارانہ تربیت سے بہت متاثر ہوئے۔

شرکاء نے ایس ڈبلیو اے ٹی ٹیم کے کمانڈوز کی جانب سے دہشت گردوں کے خلاف فرضی مشقوں کا مظاہرہ بھی دیکھا۔ شرکاء کو ہنگامی صورتحال سے نمٹنے کے تربیتی پروگرام (ایچ ای اے ٹی) کے تحت احتیاطی اور حفاظتی تدابیر سے بھی آگاہ کیا گیا۔ طلباء کو ہنگامی صورتحال کے دوران بین الاقوامی حفاظتی اصولوں اور مختلف اقسام کے ہتھیاروں کے استعمال کے بارے میں بھی آگاہ کیا گیا۔ طلباء نے فرائض کی ادائیگی کے دوران شہید ہونے والے 28 کمانڈوز کو خراج عقیدت پیش کیا۔