عمران اسماعیل کی الیکشن مہم میں مسلح جرائم پیشہ افراد کی موجودگی پر حق پرست امیدوار ..
تازہ ترین : 1

عمران اسماعیل کی الیکشن مہم میں مسلح جرائم پیشہ افراد کی موجودگی پر حق پرست امیدوار کنور نوید جمیل کااظہار تشویش

کراچی(اُردو پوائنٹ اخبار تازہ ترین۔08 اپریل۔2015ء)متحدہ قومی موومنٹ کی رابطہ کمیٹی کے رکن اور حلقہ این اے 246کے حق پرست امیدوار کنور نوید جمیل ایڈووکیٹ نے تحریک انصاف کے امیدوار عمران اسماعیل کی الیکشن کمپئین میں مسلح جرائم پیشہ افراد کی موجودگی اور اسلحے کی نمائش پر انتہائی تشویش کااظہار کیا ہے ۔ اپنے ایک بیان میں انہوں نے کہاکہ الیکشن کے نام پر سکہ بند جرائم پیشہ افراد کا اس طرح سے تحریک انصاف کے امیدوار اور عہدیداروں کے ساتھ ساتھ موجود رہنے سے تحریک انصاف کے اصل عزائم اور اصل چہرہ سامنے آگیا ہے ۔

انہوں نے کہا کہ کٹی پہاڑی سے جرائم پیشہ افراد کو تحفظ بھی پی ٹی آئی کی صفوں سے ہی فراہم کیا جاتا ہے جبکہ ان جرائم پیشہ افراد کا تعلق کراچی تو کیا سندھ سے بھی نہیں ہے ۔ کنور نوید ایڈووکیٹ نے کہا کہ 80ء کی دھائی کی دہشت گرد لسانی جماعت پی پی آئی سے تعلق رکھنے والے جرائم پیشہ افراد کو بڑی تعداد PTIمیں آکر لیڈر بننے کا موقع فراہم کیا گیا ہے اور اطلاعات یہ ہیں کہ PTIکراچی میں ایک بارپھر ایک سازشی منصوبے کے تحت لسانی فسادات کروانا چاہتی ہے ۔

کنور نوید نے کہاکہ حلقہ 246میں PTIکو اپنی مہم چلانے کیلئے کارکنان دستیاب نہیں ہیں اور وہ صرف ٹکراؤ اور تصادم کے ذریعے ہی اپنی انتخابی مہم کو میڈیا کی زینت بنا رہی ہے ۔ کنور نوید الیکشن کمیشن سے کہاکہ PTIکی جانب سے اس طرح جرائم پیشہ افراد کو انتخابی مہم کا حصہ بنانے سے علاقہ کے عوام میں خوف و ہراس بڑھ رہا ہے جس کا نوٹس لیاجائے ۔ کنور نوید جمیل ایڈووکیٹ نے کہا کہ سندھ کی انتظامیہ کوایم کیوایم کی آنکھوں کا تنکا تو نظر آجاتا ہے لیکن پی ٹی آئی کی آنکھوں کا بانس انہیں دکھائی نہیں دیتا ۔ ؟

وقت اشاعت : 08/04/2015 - 19:10:47

متعلقہ عنوان :

اپنی رائے کا اظہار کریں