مشترکہ غیر تدریسی ملازمین ویلفیئر فورم ،وفاقی اردو یونیورسٹی کے عہدیداران کا ..
تازہ ترین : 1

مشترکہ غیر تدریسی ملازمین ویلفیئر فورم ،وفاقی اردو یونیورسٹی کے عہدیداران کا اجاس ،انتظامی صورت حال پر اظہار تشویش

کراچی(اُردو پوائنٹ اخبار تازہ ترین۔08 اپریل۔2015ء)مشترکہ غیر تدریسی ملازمین ویلفیئر فورم ،وفاقی اردو یونیورسٹی کے عہدیداران کا ایک ہنگامی اجلاس منعقد کیا گیا جس میں جامعہ کی موجودہ انتظامی صورتحال اور ملازمین کے جائز مسائل کے حل کے سلسلے میں ہونے والی غیر ضروری تاخیر کے متعلق تشویش کا اظہار کیا گیا۔ عہدیداران نے ایک مشترکہ بیان میں کہا کہ اخباری خبروں کے مطابق یونیورسٹی کی سینٹ کی طرف سے یونیورسٹی کے شیخ الجامعہ کو 3 ماہ کے لیے جبری رخصت پر بھیج کر عارضی چارج کراچی یونیورسٹی کے شیخ الجامعہ کو دیا جاچکا ہے لیکن تاحال یونیورسٹی کا چارج عارضی طور پر تعینات شیخ الجامعہ کے سپرد نہیں کیا گیا جس کے بعد ملازمین اس بات کا تعین کرنے سے قاصر ہیں کہ وہ اپنے مسائل و دفتری امور کے سلسلے میں کس سے رجوع کریں اور یونیورسٹی ایک غیر یقینی اور بحرانی کیفیت کا شکار ہے اور ملازمین میں اس صورتحال کی بناء پر سخت تشویش پائی جاتی ہے۔

اس کے علاوہ شیخ الجامعہ کی متعدد بار یقین دہانی کے باوجود اب تک ملازمین کو ہاؤس سیلنگ کے بقایا جات کی ادائیگی، سینیارٹی لسٹ کا اجراء اور دیگر متعدد معاملات بھی تعطل کے شکار ہیں۔ لہٰذا مشترکہ غیر تدریسی ملازمین ویلفیئر فورم کے اس پلیٹ فارم سے یونیورسٹی کے چانسلر و صدرِ پاکستان جناب ممنون حسین سے اپیل کی جاتی ہے کہ وہ قومی زبان میں تعلیم دینے والے واحد ادارے کو اس بحرانی کیفیت سے نکالنے میں اپنا کردار ادا کریں ۔ اس اجلاس میں غیر تدریسی ملازمین ویلفیئر فورم کے کنوینیئر محمد آصف محمود، ڈپٹی کنوینیئر عبدالمجید بلوچ، محمد عدنان اور ارکان جاوید ناز ، مبین شہزاد ، حسنین بلوچ اور حسیب احمد نے شرکت کی۔

وقت اشاعت : 08/04/2015 - 16:50:35

اپنی رائے کا اظہار کریں