نائن زیرو اوراس کے اطراف چھاپے اور بے گناہ کارکنوں کی گرفتاریاں قابل مذمت ہیں عوام اپنے جذبات قابومیں رکھیں اور پرامن رہیں، الطاف حسین

بدھ 11 مارچ 2015 16:08

کراچی(اُردو پوائنٹ اخبار تازہ ترین۔11مارچ۔2015ء) متحدہ قومی موومنٹ کے قائد الطاف حسین نے کہا ہے کہ نائن زیرو اوراس کے اطراف چھاپے اور بے گناہ کارکنوں کی گرفتاریاں قابل مذمت ہیں تاہم عوام سے اپیل ہے کہ وہ اپنے جذبات قابومیں رکھیں اور پرامن رہیں۔ ایم کیو ایم کی جانب جاری اعلامیے کے مطابق رینجرز نے نائن زیرو کے قریب رہائش پذیر متحدہ قومی موومنٹ کے قائد الطاف حسین کی بڑی ہمشیرہ سائرہ بیگم کے گھر پر بھی چھاپہ مارا اور تلاشی کے نام پر توڑپھوڑ کی۔

سائرہ اسلم کئی امراض میں مبتلا اور نائن زیرو کے قریب ایک مکان میں بیوگی کی زندگی گزار رہی ہیں۔ الطاف حسین نے نائن زیرو اوراس کے اطراف میں گھروں پر چھاپوں، تلاشی اوربے گناہ کارکنوں و ذمہ داروں کی گرفتاریوں کی شدید مذمت کرتے ہوئے اسے سراسرظلم قرار دیا ہے۔

(جاری ہے)

ان کا کہنا تھا کہ رینجرز کے اعلیٰ حکام کو یہ نہیں بھولنا چاہیے کہ ان کی بھی ماں بہنیں ہیں، اگر خدانخواستہ سائرہ اسلم کو کچھ ہوا تواس کی تمام ترذمہ داری رینجرز پر عائد ہوگی۔

الطاف حسین نے کہا کہ نائن زیرو، ان کی ہمشیرہ اوردیگر کارکنوں کے گھروں پر تلاشی کے نام پر دہشت گردی کے عمل کوفی الفور رکوایا جائے۔ جہاں تک رینجرز کے الزامات کا تعلق ہے تو اس کے بارے میں تمام تر تفصیلات سے جلد ہی آگاہ کیا جائے گا۔ الطاف حسین نے عوام سے اپیل کی کہ وہ اپنے جذبات قابو میں رکھیں اور پرامن رہیں۔ ایم کیو ایم کے رہنما فاروق ستار نے اس ضمن میں کہا ہے کہ 90 پر چھاپا مارنا انتہائی تشویش ناک بات ہے۔ یہ کارروائی متحدہ کو دیوار سے لگانے کے مترادف ہے۔فاروق ستار نے کہا کہ کہ 90 پر چھاپا مارنا انتہائی تشویش ناک بات ہے۔

کراچی میں شائع ہونے والی مزید خبریں