چترال، بلدیاتی انتخابات میں دو لاکھ چھیا سی ہزار چھ سو پنتالیس ووٹر اپنا حق رائے دہی استعمال کریں گے

چترال ( اُردو پوائنٹ اخبار تازہ ترین۔ 13 مئی۔2015ء) چترال میں آنے والے بلدیاتی انتخابات میں دو لاکھ چھیا سی ہزار چھ سو پنتالیس ووٹر اپنا حق رائے دہی استعمال کریں گے ۔ الیکشن آفس چترال سے موصول شدہ اطلاعات کے مطابق ضلع بھر سے ڈسٹرکٹ کونسل کی چوبیس نشستوں کیلئے ایک سو دس امیدوراوں میں مقابلہ ہو گا ۔ اسی طرح تحصیل کونسل کیلئے ایک سو اٹھارہ امیدوارمد مقابل ہوں گے ۔

پچانوے ویلج کونسلوں اور پانچ نائبر ہوڈ نشستوں کیلئے آٹھ سو چھتیس امیدوار مقابلہ کریں گے ۔ جبکہ خواتین نشستوں کیلئے دو سو پچاس امیدوار انتخاب لڑیں گی۔ کسان سیٹوں کیلئے تین سو چھیا سی اور یوتھ کیلئے تین سو اٹھارہ امیدواروں میں مقابلہ ہو گا ۔ اقلیتی نشستو ں کیلئے چھیانوے امید وار مد مقابل ہوں گے ۔

(جاری ہے)

چترال میں بلدیاتی انتخابات کے حوالے سے جماعت اسلامی اور جمعیت العلماء اسلام کے مابین اتحاد قائم کیا گیا ہے ۔

جس میں چوبیس میں سے آٹھ آٹھ نشستیں دونوں پارٹیوں نے آپس میں تقسیم کردی ہیں ۔ جبکہ آٹھ نشستوں کو آزاد چھوڑ دیا گیا ہے ۔ اسی طرح پاکستان پیپلز پارٹی اور آل پاکستان مسلم لیگ ( پرویز مشرف ) پارٹی نے سیٹ تو سیٹ ایڈ جسمنٹ کا اعلان کیا تھا ۔ لیکن یہ سیٹ ایڈجسمنٹ صرف دروش ٹو تک ہی محدود نظر آتاہے ۔ جہاں آل پارٹیز کے صدر شہزادہ خالد پرویز اور سابق ناظم حیدر عباس کے مابین کانٹے دار مقابلے کے امکانات ہیں ۔

پاکستان تحریک انصاف اور عوامی نیشنل پارٹی کسی اتحاد کا حصہ نہیں ہیں۔ اور وہ انفرادی طور پر ہی انتخابات میں حصہ لے رہے ہیں ۔ تحریک انصاف گو کہ بڑی پارٹیوں میں شمار کی جارہی ہے ۔ لیکن اُسے دونوں اتحادوں کا سامنا ہے ۔ بلدایتی الیکشن میں اگرچہ تمام نشستیں اہمیت کی حامل ہیں تاہم چند سیٹوں کو خصوصی اہمیت دی جارہی ہے ۔ اور ان سیٹوں کے نتائج پر چترال کی سیاست میں بہت بڑی تبدیلی رونما ہونے کے امکانات ہیں ۔

ڈسٹرکٹ کونسل کے ان نشستوں میں یوسی ارندو میں پاکستان تحریک انصاف کے رہنما حاجی سلطان کا مقابلہ آل پاکستان کے شیر زمین سے ہے ۔ دروش ٹو کی نشست میں شہزادہ خالد پرویز بمقابلہ حیدر عباس ،چترال تھری دنین میں امیر جماعت اسلامی حاجی مغفرت شاہ بمقابلہ عبدالولی خان ایڈوکیٹ تحریک انصاف ، چترال ون رہنما تحریک انصاف ونگ کمانڈر ( ر) فرداد علی شاہ بمقابلہ مولانا جمشید احمد جماعت اسلامی اور قاضی فیصل پاکستان پیپلز پارٹی ،یوسی بونی رہنما پاکستان تحریک انصاف رحمت غازی بمقابلہ سابق ناظم امیر اﷲ ، چترال ٹو رہنما پاکستان پیپلز پارٹی سردار محمد خان بمقابلہ سابق ناظم ریاض احمد جے یو آئی و امین الرحمن تحریک انصاف ،یو سی کوہ جنرل سیکرٹری محمد حکیم ایڈوکیٹ پاکستان پیپلز پارٹی بمقابلہ سابق ایم پی اے رہنما جے یوآئی مولانا عبد الرحمن ، یوسی اویر رہنما پاکستان تحریک انصاف عبداللطیف بمقابلہ مولانا رحمت نظیر جے یو آئی شامل ہیں ۔

بلدیاتی انتخابات کے سلسلے میں روز بروز سرگرمیوں میں مسلسل اضافہ ہو رہاہے ۔ اور انتخابی امیدواروں نے ووٹ مانگتے لو گوں کا جینا حرام کر دیا ہے ۔ جنرل کونسلر ، یوتھ ، خواتین ، کسان مزدور ، تحصیل اور ڈسٹرکٹ کونسل کے امیداواروں کی فوج ظفر موج دن بھر دکانوں ،گھروں ، دفاتر ،بازاروں میں ووٹروں کو ہر صورت الیکشن سے متعلق اپنی عرضداشت سنانے اور سننے پر مجبور کر دیا ہے ۔

اُن کو اس بات کی ہر گز پرواہ نہیں ہو تی ۔ کہ ووٹر کو کسی ایمر جنسی یا ضروری کام درپیش ہے ۔ اور اُس کے پاس وقت نہیں ہے ۔ برادریوں اور رشتوں کے ٹوٹے بندھنوں کو جوڑنے کی کو ششیں جاری ہیں۔ تو دوسری طرف بعض اچھے بھلے رشتے ٹوٹ جانے کے واقعات بھی دیکھے جارہے ہیں ۔ لیکن زیادہ تر ووٹر کسی بھی امیدوار کی دل شکنی کرنے کی بجائے " سب اچھا "کے فارمولے پر عمل پیرا ہیں ۔

ڈسٹرکٹ کی جماعتی امیدوراوں سے لے کر ویلج کونسل کے امیدوار تک کسی کے پاس کوئی ٹھوس منشور یا ترقیاتی پروگرام نہیں ہے ۔ کہ ووٹر اپنے مسائل کے حل کیلئے دلچسپی سے اپنے ووٹ کا استعمال کرے ۔ لیکن یہ بات بھی حیران کُن ہے کہ زیادہ تر ووٹروں کوخود اپنے مسائل سے بھی اتنی دلچسپی نہیں ۔ جتنی توجہ اپنے نا پسند یدہ امیدوار کو شکست دینے پر مرکوز ہے ۔ امیدوراوں کی طرف سے گاؤں ، محلوں اور بازاروں میں لگے اشتہاروں کے ساتھ ہونے والا ناروا سلوک بھی زوروں پر ہے ۔