حج 2018ء انتظامات!

آئندہ حج کیلئے انتظامات کو مذید بہتر بنانے اور حجاج کرام کو زیادہ سے زیادہ سہولتوں کی فراہمی یقینی بنانے کے لئے وفاقی سیکرٹری مذہبی امور و بین المذاہب کی سربراہی میں حج پالیسی فارمولیشن کمیٹی قائم کی گئی۔

جمعہ 5 جنوری 2018

Hajj 2018 Intazamaat
آئندہ حج کیلئے انتظامات کو مذید بہتر بنانے اور حجاج کرام کو زیادہ سے زیادہ سہولتوں کی فراہمی یقینی بنانے کے لئے وفاقی سیکرٹری مذہبی امور و بین المذاہب کی سربراہی میں حج پالیسی فارمولیشن کمیٹی قائم کی گئی۔ جس میں اٹارنی جنرل آف پاکستان ، وزارت قانون وانصاف ، وزارت خارجہ اور مسابقتی کمیشن آف پاکستان کے نمائندوں نے حج پالیسی2017ء پر نظرثانی کی اور حج پالیسی 2018 ء کامسودہ تیار کیا۔

جس کی باضابطہ منظوری گزشتہ روز وفاقی وزیر مذہبی امور سردار محمد یوسف نے دے دی ہے۔حج پالیسی2018 ء کے مطابق آئندہ سال ایک لاکھ 79 ہزار 210 عازمین حج کی سعادت حاصل کریں گے جبکہ ایک لاکھ 20 ہزار عازمین سرکاری سکیم کے تحت حج ادا کریں گے۔حج درخواستیں 15 جنوری سے 24 جنوری تک وصول کی جائیں گی۔

(جاری ہے)

سرکاری سکیم کے تحت حج درخواستوں کی قرعہ اندازی 26 جنوری کو ہو گی لیکن80 سال سے زائد عمر کے عازمین کیلئے 10 ہزار کا الگ کوٹہ رکھا گیا ہے۔

جنوبی پاکستان کے مکینوں کیلئے حج اخراجات 2 لاکھ 70 ہزار ہونگے، اور شمالی پاکستان کیلئے 2 لاکھ 80 ہزار ہونگے جبکہ قربانی کے13,050 روپے اس حج پیکیج کے علاوہ جمع کروانا ہونگے۔ گزشتہ چار سالوں کے کامیاب تجربے کی روشنی میں اس سال بھی حجاج کرام کو مکہ مکرمہ میں عزیزیہ میں ہی ٹھہرایا جائیگا۔ منیٰ میں بہتر جگہ پر مکاتب لینے کی کوشش کی جائے گی۔

اور حجاج کرام کو ان کی رہائش سے حرم پاک اور واپس ان کی رہائش گاہ پر چھوڑنے کیلئے24گھنٹے ٹرانسپورٹ کی سہولت مہیا کی جائیگی۔ اسی طرح سرکاری حج سکیم کے 100 فیصد حجاج کرام کو مدینہ منورہ میں مسجد نبوی کے 500 میٹر کے دائرے کے اندر ٹھہرانے کی ہر ممکن کو شش کی جائیگی۔ سرکاری حج سکیم کے حجاج کو دورانِ قیام، مکہ مکرمہ، مدینہ منورہ اور منیٰ، عرفات میں تین وقت کا کھانا فراہم کیا جائیگا۔

تمام عاز مین حج کو پی آئی اے، سعودی ایئر لائن، شاہین ایئر لائن اور ایئر بلیو کے ذریعے حجاز مقدس بھجوایا جائے گا۔حج پالیسی 2018 ء کے مطابق کوئی بھی شخص جس نے زندگی میں صرف ایک بار بھی سرکاری سکیم کے تحت حج اداکیا ہو، وہ حج 2018ء کیلئے سرکاری سکیم کے تحت درخواست دینے کا اہل نہیں ہے۔ اس کے علاوہ کوئی بھی شخص جس نے گذشتہ 3 سالوں میں حج ادا کیا ہو، وہ حج 2018ء کیلئے پرائیویٹ سکیم میں درخواست دینے کا اہل تصورنہیں ہو گا، اس ضمن میں صرف خاتون کے محرم کو استثنیٰ حاصل ہوگا۔

سفر حج کیلئے کسی بھی عمر کی خاتون کے ساتھ محرم کا ساتھ ہونا لازم ہوگا۔ اسی طرح حج بدل کی اجازت بھی صرف پرائیویٹ سکیم کے ذریعے ہوگی۔تمام حجاج کو ان کی وطن واپسی پر مخصوص پیکنگ میں 5 لیٹر زم زم پاکستان میں ائرپورٹ پر مہیا کیا جائے گا۔بین الاقوامی مشین ریڈایبل پاسپورٹ، کمپیوٹرائزڈ قومی شناختی کارڈ اور میڈیکل سرٹیفیکیٹ لازم ہو گا۔

مشین ریڈایبل پاسپورٹ کی کم از کم معیاد 20 فروری 2019ء تک ہونا ضروری ہے۔ حج گروپ آرگنائزرز کا کوٹہ حج پالیسی فارمولیشن کمیٹی کی سفارشات کی روشنی میں شفاف انداز میں مختص کیا جائے گا، جو افراد پرائیویٹ سکیم کے تحت حج ادا کریں گے ان کیلئے وزارت حج پیکیج کا جائزہ لے گی تاکہ حجاج کو کم خرچ میں زیادہ سے زیادہ سہولیات بہم پہنچائی جا سکیں۔

اس سلسلے میں حجاج کی شکایات جو بذریعہ کال سینٹر ، ای میل اور خصوصی نگران ٹیموں کے ذریعے موصول ہوں گی ان کا فوری ازالہ کیا جائیگا۔حج 2018ء میں حجاج کرام کی تعداد کو مدنظر رکھتے ہوئے حج میڈیکل مشن اہلکار، معاونین حجاج، وزارت کے سیزنل سٹاف اور پاکستانی لوکل معاونین پر مشتمل عملے کو تعداد اور ضرورت کی بنیاد پرتعینات کیا جائے گا۔ جبکہ حج دورانیہ 30 دن تک لانے کیلئے بھی تمام سٹیک ہولڈرز کے ساتھ مشاورت کی جائے گی۔

اور حکومت پاکستان حالیہ مردم شماری کے نتائج کی روشنی میں حج کوٹہ میں اضافے کے لئے بھی سعودی حکومت سے بات چیت کریگی۔بلاشبہ حج اسلام کے پانچ ارکان میں سے ایک عظیم رکن اور پوری امت کے لیے ہمہ گیر عبادت ہے۔ حج ادا کرنے والے اہل ایمان علاقوں ، رنگ ،نسل ، قبائل و برادریوں سے بالا تر ہو کر، دنیاوی ظاہری زیب وزینت کو چھوڑ کر ایک طرز کے احرام میں ملبوس ہوکر یہ اقرار کرتے ہیں کہ ” اے اللہ حاضر ہوں ، میرے اللہ میں حاضر ہوں ، حاضر ہوں ، تیرا کوئی شریک نہیں ،میں حاضر ہوں۔

یقینا تعریف سب تیرے ہی لیے ہے ، نعمت سب تیری ہی ہے اور ساری بادشاہی تیری ہے تیرا کوئی شریک نہیں“۔ حجاج کرام حضور اکرم ﷺ کے بتائے ہوئے طریقے کے مطابق وارفتگی اور دیوانگی سے حج کی ادائیگی کرکے اپنا تعلق حضرت ابراہیم  اور حضرت اسماعیل  کی عظیم قربانیوں کے ساتھ جوڑتے ہیں۔ حج اس لحاظ سے بڑی نمایاں عبادت ہے کہ یہ بیک وقت روحانی، مالی اور بدنی تینوں پہلووٴں پر مشتمل ہے، یہ خصوصیت کسی دوسری عبادت کو حاصل نہیں ہے ۔

کسی بھی مسلمان کے سفر حج کا مقصد ایک فرض ادا کرنا ، اپنے ربّ کو راضی کرنا، گناہوں کی معافی مانگنا ، اپنے نفس کو پاک کرنا اور اب تک کی زندگی میں کئے جانے والے اعمال پر توبہ کرکے باقی عمر اسلامی احکامات کے مطابق گزارنے کا عزم کرنا ہوتا ہے۔ مگر صد افسوس کہ گزشتہ دور حکومت میں حج جیسے مقدس فریضے کی انجام دہی میں بھی حکومتی شخصیات نے کرپشن کے ریکارڈ بنا کر اور حجاج کرام کو مشکلات سے دوچار کرکے کرپشن کی بدترین مثال قائم کی۔

موجودہ وزارت مذہبی امور کی جانب سے حج 2018 ء میں حاجیوں کی سہولیات کے لئے کئے جانے والے اعلانات لائق تحسین ہیں ، مگر ضرورت اس امر کی ہے کہ حجاج کرام کے لئے جدید سہولیات کے ساتھ ساتھ حج اخراجات میں بھی کمی لائی جائے تاکہ غریب پاکستانی بھی حج کی سعادت حاصل کرسکیں۔ اللہ ربّ العزت ہم سب کو حج مبرور کی سعادت نصیب فرمائے آمین۔

ادارہ اردوپوائنٹ کا مضمون نگار کی رائے سے متفق ہونا ضروری نہیں ہے۔

متعلقہ مضامین :

متعلقہ عنوان :

Hajj 2018 Intazamaat is a Special Articles article, and listed in the articles section of the site. It was published on 05 January 2018 and is famous in Special Articles category. Stay up to date with latest issues and happenings around the world with UrduPoint articles.