عراقی صوبہ انبارداعش کے نرغے میں

امریکہ نے عراق میں تباہی و بربادی کی داستان رقم کرتے ہوئے اس اس کانقشہ ہی بدل کر رکھ دیا ۔ عراق 2003 سے مسلسل امریکی عتاب کا نشانہ بنتا چلا آرہا ہے ۔امریکہ نے عراق پر کیمیائی ہتھیاروں کا الزام عائد کرتے ہوئیاسے بارود اور راکھ کے ڈھیر میں تبدیل کر دیا۔ اس کی مداخلت کے باعث داعش کی داغ بیل پڑی بعدا زاں داعش نے عراق کے بڑے حصو ں پر قبضے کر کے اپنی خلافت کا اعلان کر دیا ۔

یورپ پر داعش کے حملوں نے امریکہ کو یہ باور کرد یا کہ اس نے عراق کو داعش کے رحم و کرم پر چھوڑ کر تاریخ کی سب سے بڑی غلطی کی تھی۔ اس لیے امریکہ داعش کا قلع قمع کرنے کے لیے ازسر نو اپنی فوجیں عراق بھیجنے پر مجبور ہے۔ عراق میں نہ صرف امریکہ اپنا کھیل جاری رکھے ہوئے ہے بلکہ ایران بھی یہاں اپرنے مفادات کی لڑائی لڑ رہا ہے۔

(جاری ہے)

ایران عراق میں شیعہ ملیشیاء کی حمایت اور امداد کر رہا ہے۔

امریکی و عراقی عہدیداروں کا کہنا ہے کہ ایرانی نواز ملیشیاء عراق میں اغواء برائے تاوان قتل وغارت سمیت سنی شہریوں کی تحریک کے خلاف مزاحمت کر رہی ہے۔ ایک طرف ایران عراق میں مداخلت کر رہا ہے تو دوسری طرف امریکہ عراقی فوجیوں پر دباو بڑھا رہا ہے کہ وہ صوبہ انبار میں داعش کے قبضہ سے اپنے علاقے و اگزار کروائیں۔ اس مقصد کے حصول کے لیے وہ فضائیہ کے ذریعے عراقی اہلکاروں کی مدد بھی کر ہا ہے ۔

فلوجہ صوبہ انبار کا سنی اکثریتی شہر ہے۔ یہ عرصہ دراز سے داعش کے قبضہ میں ہے۔ فلوجہ کے شہریوں کا احوال زندگی ناقابل بیان ہے ۔ یہ عراقی فورسز اور شیعہ ملیشیاء اور داعش جیسی تنظیموں کے درمیان نوالہ تر بنے ہوئے ہیں۔ ان کی جان و مال کو تحفظ حاصل ہے اور نہ ہی ان کا کوئی پرسان حال ہے۔
عراق کا صوبہ انبار شدت پسندوں کی عسکری کارروائیوں کے باعث اجڑ کر رہ گیا ہے۔

شہری اپنی بقاء کو یقینی بنانے کے لیے نقل مکانی کر کے دوسرے علاقوں میں پناہ گزینی کی زندگی گزارنے پرمجبور ہیں۔ ماہرین کا کہنا ہے کہ امریکہ اور ایران دونوں ہی چاہتے ہیں کہ عراق میں داعش کو شکست فاش دے دی جائے کیونکہ داعش امریکہ یورپ اور شیعہ برادری کے خلاف کارروائیوں میں ملوث ہے۔ ایران اور امریکہ باہمی اختلافات کے باعث اپنے دوشمن داعش کے خلاف مشترکہ محاذ قائم نہیں کر پائے۔

گزشتہ برس امریکہ اور ایران کے درمیان ہونے والے معاہدے کے مدنظر رکھ کر یہ کہا جارہا ہے کہ دونوں ممالک داعش کے خلاف مشترکہ محاذ قائم کرنے میں کامیاب ہو جائیں گے۔ انبار عراق کا ایسا علاقہ ہے جہاں امریکہ کو سخت مزاحمت کا سامنا کرنا پڑتا تھا۔ یہاں سینکڑوں امریکی فوجی اہلکار موت کے گھاٹ اتارے گے۔ یہ مغربی عراق کا وسیع وعریض صحرا نما علاقہ ہے جو عرصہ دراز سے شورش زدگی کا شکار ہے۔

پہلے یہ القاعدہ کے قبضے میں تھا اب یہ داعش کے کنٹرول میں ہے۔ (ایک جانب امریکہ عراق میں داعش کے قبضے سے علاقے واگزار کروانے کیلئے عراقی فوج اور قبائلیوں کی مدد کر رہا ہے۔ دوسری طرف ایران اس صوبے میں اپنے مقاصد حاصل کرنے میں مصروف ہے۔ ایران عراق میں ایک ایسا ووٹ چاہتا ہے جو شام تک جانے کے لیے اس کی مدد کرے۔ یہ بشارالاسد حزب اللہ ، لبنانی شیعہ تحریک اور عراق میں ان علاقوں کا تحفظ کرنا چاہتا ہے جہاں شیعہ اکثریت میں موجود ہیں۔ امریکہ اور ایران سمیت بہت سے ممالک عراق میں اپنے مفادات کی جنگ لڑ رہے ہیں ۔ امریکہ نے عراق کو ایک ایسا آتش فشاں بنایا ہے جس سے مسلسل 13 برسوں سے صرف آگ ہی برس رہی ہے۔