شیخ رشید کی عمران سے صلح کیلئے خورشید شاہ کی منتیں

شاہ جی عمران سے صلح کر لیں،شیخ رشید ،سیاستدان ہوں بے غیرت نہیں،خورشید شاہ

جمعرات 10 نومبر 2016 11:50

اسلام آباد(اُردو پوائنٹ اخبارآن لائن۔10نومبر۔2016ء)پارلیمنٹ کی راہداری میں شیخ رشید نے خورشید شاہ کو پکڑ لیا ، اپوزیشن لیڈر سے ہاتھ جوڑ کرعمران خان سے صلح کرنے کی اپیل کردی۔تفصیلات کے مطابق اپوزیشن لیڈر سید خورشید شاہ کو شیخ رشید نے پارلیمنٹ کی راہداری میں جاتے جاتے پکڑ لیا اور ان سے ہاتھ جوڑ کر کہا کہ شاہ جی آپ عمران خان کی مخالفت چھوڑ کیوں نہیں دیتے ؟ جس پر اپوزیشن لیڈر نے کہاکہ میں سیاستدان ہوں کوئی بے غیرت نہیں اس پر شیخ رشید نے دھیمے لہجہ اختیار کرتے ہوئے جواب دیا ”عمران خان بھی بے غیرت نہیں“میں آپ کے ذریعے عمران خان کو پیغام دوں گا۔

،خورشید شاہ نے کہا کہ چھوڑیں شیخ صاحب،ادھرن لیگ والے بھی کھڑے ہیں الگ سے بات کریں گے کہیں ن لیگ ہماری بات چیت سے کوئی فائدہ نہ اٹھا لے۔

(جاری ہے)

بعد ازاں میڈیا سے بات چیت کرتے ہوئے شیخ رشید نے کہاکہ شاہ جی بادشاہ آدمی ہیں ،ان سے کہا تھا کہ عمران کی مخالفت چھوڑ دیں اور ہم دونوں جماعتیں مل کر نواز شریف کو ٹف ٹائم دے سکتے ہیں اور اقتدار سے الگ بھی کر سکتے ہیں لیکن خورشید شاہ میری بات پر غصے میں آگئے جو منہ آیا کہتے رہے ۔واضح رہے کہ چیئرمین تحریک انصاف عمران خان نے متعدد بار جلسوں اور میڈیا سے گفتگو کے دوران خورشید شاہ کو آڑے ہاتھوں لیا اور اسے ڈبل شاہ قرار دیتے رہے تاہم خورشید شاہ نے آج شیخ رشید کے ذریعے عمران خان کو غصے سے بھرا پیغام پہنچایا