بھارت نے کبوتر سیریز کی اگلی قسط ریلیز کردی ، بی ایس ایف کا ایک اور پاکستانی جاسوس کبوتر پکڑ نے کا دعویٰ

کبوتر سے وزیر اعظم مودی کے نام دھمکی آمیز خط برآمد ، مودی سن لے، پاکستان کا بچہ بچہ لڑنے کیلئے تیار ہے، کشمیر پر ظلم کا بدلہ لیا جائے گا، یہ 71 والا پاکستان نہیں ہے۔ لشکر طیبہ،کبوتر سے برآمد ہونے والے خط کی عبارت

پیر 3 اکتوبر 2016 10:38

پٹھانکوٹ/نئی دہلی (اُردو پوائنٹ اخبارآن لائن۔3اکتوبر۔2016ء)بھارت نے کبوتر سیریز کی اگلی قسط ریلیز کردی اور دعویٰ کیا ہے کہ ان کی بارڈر سکیورٹی فورس نے ایک اور پاکستانی جاسوس کبوتر پکڑ لیا ہے جس سے وزیر اعظم مودی کے نام دھمکی آمیز خط برآمد ہوا ہے۔

(جاری ہے)

بھارتی میڈیا کے مطابق پٹھانکوٹ کے قریب بامیال سیکٹر پر سمبال چوکی پر ڈیوٹی پر موجود بارڈر سکیورٹی فورس(بی ایس ایف)کے اہلکاروں نے ایک کبوتر پکڑا ہے جس کی ٹانگوں پر مودی کے نام ایک پرچی باندھی گئی تھی جس میں اردو زبان میں عبارت لکھی ہوئی تھی ۔

دھمکی آمیز خط ملنے کے بعد بی ایس ایف کے اہلکاروں نے کبوتر کو فوری طور پر گرفتار کرلیا ۔ کبوتر سے برآمد ہونے والے خط میں اردو زبان میں لکھا گیا ہے کہ مودی سن لے، پاکستان کا بچہ بچہ لڑنے کیلئے تیار ہے۔ کشمیر پر ظلم کا بدلہ لیا جائے گا، یہ 71 والا پاکستان نہیں ہے، لشکر طیبہ ۔واضح رہے کہ اس سے قبل بھارتی پنجاب کے ضلع گورداس پور میں پولیس نے نریندر مودی کو وارننگ کی تحریر والے کئی غبارے پکڑنے کا دعویٰ کیا تھاجن پر درج تھا مودی سن لے ، ایوبی کی تلواریں ہمارے پاس ہیں۔