بلا اشتعال بھارتی جارحیت،ملک کو درپیش مسائل ، پارلیمانی جماعتوں کے سربراہان کا اجلاس آج طلب

وزیراعظم کشمیر پالیسی اور ایل اوسی پر موجودہ صورتحال پر پارلیمانی رہنماؤں کو اعتماد میں لیں گے قومی سلامتی سے متعلق امور پر بھی تبادلہ خیال کیا جائے گا

اتوار 2 اکتوبر 2016 12:56

اسلام آباد(اُردو پوائنٹ اخبارآن لائن۔2اکتوبر۔2016ء) وزیراعظم نواز شریف نے کنٹرول لائن پر بلا اشتعال بھارتی جارحیت پر تمام پارلیمانی جماعتوں کے سربراہان کا اجلاس آج پیر تین اکتوبر کو طلب کر لیا ہے، اجلاس میں وزیراعظم کشمیر پالیسی اور لائن آف کنٹرول پر ملک کی موجودہ صورتحال و ملک کو درپیش مسائل و دیگر اہم امور پر پر پارلیمانی رہنماؤں کو اعتماد میں لیں گے۔

وزیراعظم ہاؤس سے جاری اعلامیہ میں بتایا گیاہے کہ وزیر اعظم نواز شریف کی صدارت میں ہونیوالے اجلاس کیلئے تمام سیاسی جماعتوں کے قائدین کو دعوت نامے ارسال کردئیے گئے ہیں اور تمام سیاسی قائدین نے اجلاس میں شرکت پر رضامندی بھی ظاہر کی ہے ۔اجلاس میں میں مقبوضہ کشمیر کی صورتحال ، بھارت کی جانب سے اشتعال انگیز اقدامات،دھمکی آمیز بیانات ، کنٹرول لائن پر بڑھتی ہوئی بھارتی جارحیت اور حکومتی پالیسی سے متعلق امور زیر غور آئیں گے، وزیراعظم پارلیمانی جماعتوں کے رہنماؤں کو مقبوضہ کشمیر اور ایل او سی پر موجودہ صورتحال سے متعلق آگاہ کریں گے اور پارلیمانی رہنماؤں سے مستقبل کی کشمیر پالیسی اور بھارتی جارحیت کا منہ توڑ جواب دینے کے حوالے سے تجاویز بھی طلب کرینگے، اجلاس میں چاروں صوبوں کے وزرائے اعلیٰ اور وفاقی وزراء بھی شرکت کرینگے۔

(جاری ہے)