افغانستان نے پاکستان سے تحریری معافی مانگ لی، باب دوستی آج کھولنے کا فیصلہ

18 اگست کا واقعہ نا قابل برداشت ہے جس کی مذمت کرتے ہیں، ملوث افراد کو کیفر کردار تک پہنچائیں گے، سربراہ افغان وفد دونوں ملکوں کی فورسز کے اجلاس میں ہر ماہ فلیگ میٹنگ کے انعقاد پر اتفاق، ہاٹ لائن بھی قائم کی جائے گی

جمعرات 1 ستمبر 2016 11:03

چمن( اُردو پوائنٹ اخبارآن لائن۔1ستمبر۔2016ء )پاکستان کے دو ٹوک موقف کے آگے افغانستان نے گھٹنے ٹیک دیئے اور باقاعدہ معافی مانگ لی جس کے بعد آج (جمعرات )سے باب دوستی کھول دیا جائے گا۔تفصیلات کے مطابق پاکستان اور افغانستان کی سکیورٹی فورسز کی پانچویں فلیگ میٹنگ میں افغان حکام کی جانب سے 18 اگست کو پیش آنے والے واقعے پر باقاعدہ طور پر تحریری معافی مانگی گئی۔

افغان وفد کے سربراہ لیفٹیننٹ کرنل محمد چنگیز نے کہا کہ18 اگست کا واقعہ نا قابل برداشت ہے جس کی مذمت کرتے ہیں اور ملوث افراد کو کیفر کردار تک پہنچائیں گے۔ فلیگ میٹنگ میں فیصلہ کیا گیا کہ افغانستان کے باقاعدہ معافی مانگنے کے بعد آج سے باب دوستی کھول دیا جائے گا۔ دونوں ملکوں کی فورسز کے اجلاس میں ہر ماہ فلیگ میٹنگ کے انعقاد پر اتفاق کیا گیا جبکہ یہ فیصلہ بھی کیا گیا کہ پاک افغان بارڈر پر ہاٹ لائن قائم کی جائے گی تاکہ آئندہ ایسا واقعہ پیش نہ آسکے۔

(جاری ہے)

واضح رہے کہ 18 اگست کو افغانوں کی جانب سے اپنی حدود میں انڈیا کے حق میں پاکستان مخالف مظاہرہ کیا گیا تھا جبکہ افغان فورسز نے کوئی ایکشن نہیں لیا۔ افغانوں کے احتجاج کے دوران باب دوستی پر پتھراؤ بھی کیا گیا تھا جس کی وجہ سے پاکستانی سکیورٹی فورسز نے باب دوستی بند کردیا تھا۔ افسوسناک واقعہ پیش آنے پر وزیر اعظم نواز شریف نے حکم دیا تھا کہ جب تک افغانستان باقاعدہ طور پر معافی نہیں مانگ لیتا باب دوستی نہ کھولا جائے۔

متعلقہ عنوان :