امید ہے محمد عامر کو برطانوی ویزا جاری کردیا جائیگا، شہریار خان

ویزے کیلئے خاص طور پر برطانوی ہائی کمشنر کو خط تحریر کیا ، کہا گیا ہے عامر کا معاملہ خاص توجہ کا متقاضی ہے لہذا اس پر ہمدردانہ غور کیا جائے، انٹرویو

جمعہ 20 مئی 2016 09:19

کوئٹہ(اُردو پوائنٹ اخبارآن لائن۔20 مئی۔2016ء)پاکستان کرکٹ بورڈ کے چیرمین شہریارخان کو امید ہے کہ سپاٹ فکسنگ میں سزا یافتہ فاسٹ بولر محمد عامر کو برطانوی ویزا جاری کردیا جائیگا۔، محمد عامر کو ویزے دیے جانے کا معاملہ اب اس مرحلے پر ہے کہ یا تو انھیں ویزا ملے گا یا نہیں تاہم اس کے بارے میں انھیں مثبت اشارے ملے ہیں۔ غیر ملکی خبررساں ادارے کو انٹرویو دیتے ہوئے شہریارخان نے کہا کہ محمد عامر کے ویزے کیلیے انھوں نے خاص طور پر برطانوی ہائی کمشنر کو بھی خط تحریر کیا ہے جس میں یہ کہا گیا ہے کہ محمد عامر کا معاملہ خاص توجہ کا متقاضی ہے لہذا اس پر ہمدردانہ غور کیا جائے۔

شہریارخان نے کہا کہ انگلینڈ کرکٹ بورڈ بھی محمد عامر کے ویزے کے معاملے میں اپنا کردار ادا کر رہا ہے اور وہ ہوم آفس سے رابطے میں ہے۔

(جاری ہے)

پاکستان کرکٹ بورڈ کے چیئرمین نے کہا کہ محمد عامر کو ایک علیحدہ فارم بھرنا پڑا ہے جس میں انھیں عدالت کی جانب سے سزا کے بارے میں سوالات کے جوابات دینے تھے جو انھوں نے دے دیے ہیں۔واضح رہے کہ محمد عامر کو اپنے دیگر دو ساتھی کرکٹرز سلمان بٹ اور محمد آصف کے ساتھ سپاٹ فکسنگ میں ملوث ہونے کی پاداش میں نہ صرف آئی سی سی کی طرف سے پابندی کا سامنا کرنا پڑا تھا بلکہ لندن کی عدالت نے بھی انھیں سزاسنائی تھی۔

محمد عامر پابندی مکمل ہونے کے بعد دوبارہ پاکستانی ٹیم میں شامل ہوئے ہیں اور نیوزی لینڈ بنگلہ دیش اور بھارت جاچکے ہیں۔پاکستان کرکٹ بورڈ کو عامر کے ویزے کے لیے اس لیے بھی امید ہے کہ کامن ویلتھ ممالک میں شامل نیوزی لینڈ انھیں ویزا جاری کرچکا ہے۔

متعلقہ عنوان :