اسلام آباد، جامعہ حفصہ میں مشکو ک افراد کی رہائش کا شبہ، سیکورٹی فورسز کے آپریشن کی تیاری مکمل ،آپریشن آئندہ 72گھنٹوں میں کسی بھی وقت کیاجاسکتاہے،جامعہ حفصہ انتظامیہ نے متوقع آپریشن سے نمٹنے کے لیے جوابی حکمت عملی وضع کرنا شروع کردی ، طالبات کی چھٹیاں ختم کرکے فوری حاضر ی کی ہدایات بھی جاری

بدھ 3 فروری 2016 08:41

اسلام آباد (اُردو پوائنٹ اخبارآن لائن۔ 3فروری۔2016ء) لال مسجد کے ذیلی مدرسہ برائے خواتین جامعہ حفصہ میں مشکو ک افراد کی متوقع رہائش پر سیکورٹی فورسز نے آپریشن کی تیاری مکمل کرلی ہے ، آپریشن آئندہ 72گھنٹوں میں کسی بھی وقت کیاجاسکتاہے ،جامعہ حفصہ انتظامیہ نے متوقع آپریشن سے نمٹنے کے لیے جوابی حکمت عملی وضع کرنا شروع کردی ہے طالبات کی چھٹیاں ختم کرکے فوری حاضر ی کی ہدایات بھی جاری کی گئی ہیں ۔

مصدقہ ذرائع نے خبر رساں ادارے کو بتایاکہ حساس اداروں نے وفاقی وزارت داخلہ کو اپنی رپورٹ میں آگاہ کیاہے کہ لال مسجد کے ذیلی مدرسہ برائے خواتین جامعہ حفصہ میں مشکو ک افراد رہائش پذیر ہیں اور ان میں ایسے لوگ بھی ہیں جو مبینہ طورپر دہشت گرد ہوسکتے ہیں ہمیں اس کے لیے آپریشن کی اجازت دی جائے ۔

(جاری ہے)

جس پر وزارت داخلہ نے دیگر ذرائع سے معلومات اکٹھی کی ہیں اور قانونی نافذ کرنے والے اداروں کو آپریشن کی باضابطہ اجازت کسی بھی وقت دی جاسکتی ہے قانون نافذ کرنے والے اداروں نے اپنی تیاریاں مکمل کرلی ہیں ۔

ذرائع کا کہناہے کہ آپریشن سے قبل جامعہ حفصہ کے اردگرد پورے علاقے کو گھیرے میں لیاجائے گا اور آس پاس کے پورے علاقے کی تلاشی لی جائے گی آنے جانے والے خواتین وحضرات کی جامع تلاشی اور قومی شناختی کارڈ بھی چیک کیاجائے گا ۔ بعض ذرائع کا یہ بھی کہنا ہے کہ قومی شناختی کارڈ کی پڑتال اور گرد اقدامات پہلے سے جاری ہیں اور اب بھی باقاعدہ طورپر شناختی کارڈ چیک کیے جارہے ہیں ۔

آپریشن سے قبل ہی سخت قسم کا سیکورٹی حصار پہلے ہی جامعہ حفصہ کے گرد قائم کردیاگیا ہے اس حصار میں پاکستان رینجرز ،انسداد دہشت گردی اسکوارڈ،ایلیٹ اور پولیس کی نفری شامل ہیں یہ ادارے درجہ بدرجہ تعینات کیے گئے ہیں سیکورٹی ادارے پوری طرح الرٹ ہیں جبکہ ایس ایس پی آپریشن اس تمام عمل کی خود نگرانی کررہے ہیں جیسے ہی حکام بالا سے ہدایات موصول ہوں گی آپریشن شروع کردیاجائے گا ۔

دوسری جانب جامعہ حفصہ کی انتظامیہ نے بھی سیکورٹی اداروں کی بڑھتی ہوئی نقل وحرکت اور خطرے کا ادراک کرتے ہوئے جوابی اقدامات شروع کردئیے ہیں ۔طالبات کو ہر طرح کی صورت حال سے نبردآزما ہونے کے لیے ہر طرح سے تیار رہنے کا کہا گیا ہے جو طالبات چھٹیوں پر گھر گئی ہوئی تھیں انہیں بھی واپس آنے کی ہدایت کردی گئی ہے جس پر طالبات کی واپسی شروع ہوگئی ہے ۔خبر رساں ادارے کے رابطہ کرنے پر آئی جی اسلام آباد پولیس خالد خٹک کے بارے میں بتایاگیاکہ وہ میٹنگ میں ہیں اس لیے ایس ایس پی آپریشن سے بات کرلیں جبکہ ایس ایس پی آپریشن سے رابطہ کرنے پر بتایاگیاکہ آپریشن کی کوئی تیاری نہیں ہے سیکورٹی صورت حال کے پیش نظر سیکورٹی حصار لگایاگیا ہے

متعلقہ عنوان :