بھارت،شوہر کے موبائل میں بیلنس نہ ہونے پر بیوی نے خود کشی کرلی،رشتہ داروں سے بات کرنے کیلئے شوہر سے موبائل مانگا،بیلنس نہ ہونے پر دونوں کے درمیان جھگڑا ہوا،شوہر گھر سے چلا گیا ،بیوی نے پھندا لے لیا

بدھ 6 جنوری 2016 09:35

بل پور،بھارت(اُردو پوائنٹ اخبارآن لائن۔ 6جنوری۔2016ء) دنیا میں مختلف لوگ اپنی پریشانیوں اور احساس جرم کی بدولت اپنی زندگی کا خود ہی خاتمہ کرلیتے ہیں لیکن بھارت میں ایک خاتون کو اپنے شوہر کے موبائل فون میں بیلنس نہ ہونا اتنا برا لگا کہ اس نے اپنی زندگی کا ہی خاتمہ کرلیا۔

(جاری ہے)

بھارتی میڈیا کے مطابق ریاست مدھیہ پردیش کے ضلح جبل پور کے علاقے چرگواتھانہ کے رہائشی گرام بڑکھیرا کی بیوی اوم دیوی کو اپنے رشتے داروں سے بات کرنا تھی جس کے لئے اس نے شوہر سے اس کا موبائل فون مانگا ، شوہر نے کہا کہ اس کے موبائل فون میں بیلنس ہی نہیں۔

یہ بات اتنی زیادہ بڑھی کہ پہلے دونوں کے درمیان تلخ جملوں کا تبادلہ ہوا اور پھر یہ نوک جھونک بڑھ کر گھمسان کی لڑائی میں تبدیل ہوگئی۔ شوہر معاملے کو رفع دفع کرنے کے لئے گھر سے باہر چلا گیا لیکن بیوی نے یہ بات دل پر لے لی اور گھر میں ہی گلے میں پھندا ڈال کر اپنی زندگی کا خاتمہ کرلیا۔