ایران سے پاکستان تیل اسمگل کیے جانے کا سنسنی خیز انکشاف،حجم اس قدر زیادہ ہے کہ وفاقی حکومت تخمینہ لگانے سے بھی قاصر، رواں سال جو ایرانی تیل پکڑا گیا ہے وہ 24ارب روپے کا تھا۔ قومی خزانے کو بڑے نقصان کا بڑا اسکینڈل سامنے آگیا

جمعرات 13 اگست 2015 09:13

تربت(اُردو پوائنٹ اخبارآن لائن۔13 اگست۔2015ء)ایران سے پاکستان تیل اسمگل کیے جانے کا سنسنی خیز انکشاف ہوا ہے، حجم اس قدر زیادہ ہے کہ وفاقی حکومت تخمینہ لگانے سے بھی قاصر ہے۔ صرف رواں سال جو ایرانی تیل پکڑا گیا ہے وہ 24ارب روپے کا تھا۔ قومی خزانے کو بڑے نقصان کا بڑا اسکینڈل سامنے آگیا۔ وفاقی حکومت نے نقصان کا تخمینہ لگانے کے لیے کنسلٹنٹ کی خدمات حاصل کرلیں۔

اسکینڈل ہے ایران سے پاکستان کو تیل کی اسمگلنگ کا۔ سرکاری دستاویز کے مطابق صرف رواں سال کے پہلے 7ماہ میں پکڑے گئے ایرانی تیل کی مالیت ہے 24ارب روپے ہے۔ میڈیا رپورٹس کے مطابق ایران سے کْل کتنا تیل اسمگل ہو رہا ہے، حکام سمیت کوئی نہیں جانتا۔ پاک ایران بارڈر 730کلومیٹر طویل ہے اور اسمگلر اسی کا فائدہ اٹھاتے ہیں، جب کہ سمندر کے راستے بھی تیل اسمگل کیا جاتا ہے۔

(جاری ہے)

پاکستان میں ایرانی تیل آتا ہے تقریباً آدھی قیمت پر اور پٹرول مافیا بیچتا ہے، صارف کو پوری قیمت پر، مگر قومی خزانے میں پٹرول پر ٹیکس یا لیوی کی مد میں ایک روپیہ بھی نہیں جاتا۔ حیرت کی بات یہ ہے کہ پاک ایران سرحد کے دونوں اطراف چیک پوسٹیں بھی ہیں، لیکن دونوں جانب کی سیکیورٹی فورسز کو اسمگلرز کے یہ آئل ٹینکرز نہ جانے کیوں نظر نہیں آتے اور سمندر کی حدود میں بھی انہیں روکنے والا کوئی نہیں۔

سرکاری دستاویز کے مطابق ایرانی تیل کی کوالٹی بھلے کچھ کم سہی، مگر یہ پاکستان بھر میں دستیاب ہے۔ وفاقی حکومت کا کہنا ہے کہ بارڈر پر قائم 252پٹرول پمپ گرا دیے گئے ہیں، تاکہ وہاں اسمگل شدہ پٹرول ذخیرہ نہ کیا جا سکے۔ سرکاری دستاویزات کے مطابق آج تک اسمگلرز کے خلاف مقدمات درج ہوئے ہیں، صرف 52اور ان کا ٹرائل ہوا ہے محض صرف 5کیسز میں۔