شہیدوں کی پارٹی چھوڑ کر جانیوالے ہیرو سے زیرو بن جاتے ہیں‘بلاول بھٹو زرداری،پیپلزپارٹی کی قیادت کو ضیاء کی باقیات سے محب وطن ہونے کے سرٹیفکیٹ کی کوئی ضرورت نہیں‘ آصف علی زرداری کی تقریر کا ایک ایک حرف ملک کے کروڑوں سیاسی ورکروں کے دل کی آواز ہے،گفتگو

بدھ 8 جولائی 2015 10:03

لاہور(اُردو پوائنٹ اخبارآن لائن ۔8 جولائی۔2015ء) پاکستان پیپلزپارٹی کے چیئرمین بلاول بھٹو زرداری نے کہا ہے کہ پیپلزپارٹی آج بھی چاروں صوبوں کی زنجیر ہے جو ملک بھر میں بینظیر بھٹو شہید کے مشن کے مطابق سیاست کر رہی ہے۔ پیپلزپارٹی کو ختم کرنے کی باتیں کرنیوالے احمقوں کی جنت میں رہتے ہیں جبکہ سرمایہ داروں اور آمروں نے ہمیشہ اسے ختم کرنے کی کوششیں کیں لیکن وہ اپنے مذموم مقاصد میں ہمیشہ ناکام رہے۔

پیپلزپارٹی کو یہ اعزاز حاصل ہے کہ اس نے اپنے قیام کے بعد ملکی دفاع‘ خوشحالی‘ ترقی ‘ خارجی وداخلی صورتحال قانون سازی معیشت کی بہتری اور جمہوریت کی بحالی ومضبوطی کیلئے جو اقدامات اٹھائے وہ تاریخ میں سنہری حروف سے لکھے جائینگے۔ یہ بات انہوں نے پاکستان پیپلزپارٹی جنوبی پنجاب کے صدر مخدوم سید احمد محمود سے بلاؤل ہاؤس کراچی میں ملاقات کے دوران گفتگو کرتے ہوئے کہی کہ عوام آج بھی شہید بھٹو اور شہید بی بی سے وفاداری کا دم بھرتے ہیں۔

(جاری ہے)

شہیدوں کی پارٹی چھوڑ کر جانیوالے ہیرو سے زیرو بن جاتے ہیں۔ پنجاب میں پارٹی کو مضبوط اور فعال بنانا ہماری اولین ترجیح ہے۔ جس کیلئے عید کے بعد لاہور آمد کے موقع پر کارکنوں سے ملاقاتوں‘ ناراض سینئر رہنماؤں سے رابطے تیز کرنے کے علاوہ بلدیاتی انتخابات وپارٹی تنظیموں کو از سر نومضبوط اور فعال بنانے کے حوالے سے اہم فیصلے کیے جائینگے۔

پیپلزپارٹی کی قیادت کو ضیاء کی باقیات سے محب وطن ہونے کے سرٹیفکیٹ کی کوئی ضرورت نہیں ۔ آصف علی زرداری کی تقریر کا ایک ایک حرف ملک کے کروڑوں سیاسی ورکروں کے دل کی آواز ہے۔ ہمارا مینڈیٹ ہمیشہ چرایا گیا لیکن ہم نہ پہلے کبھی گھبرائے تھے نہ اب گھبرائیں گے کیونکہ عوام کبھی بھی شہید بھٹو اور شہید بی بی کے ساتھ بے وفائی نہیں کرسکتے۔آصف علی زرداری نے پاک فوج پر کوئی تنقید نہیں کی۔ ضیاء کی باقیات نے سابق صدر کا بیان توڑ مروڑ کر پیش کیا۔شہید ذوالفقار علی بھٹو کی دی ہوئی زبان حقوق کا تحفظ کرتی ہے یہی ہمارا سرمایہ ہے۔

متعلقہ عنوان :