“را” نے زمبابوے ٹیم کو دھمکی آمیزپیغام بھیجا،وزیرداخلہ پنجاب،بھارتی خفیہ ایجنسی کے افسر نے ایس ایم ایس میں لکھا کہ اگر پاکستان گئے تو زندہ واپس نہیں لوٹیں گے،زمبابوین ٹیم کو صدرکی سیکیورٹی دی گئی،گراوٴنڈ کے باہر خود کش دھماکے میں بھی “را” ملوث تھی

بدھ 24 جون 2015 08:51

لاہور(اُردو پوائنٹ اخبارآن لائن۔24 جون۔2015ء)وزیرداخلہ پنجاب کرنل (ر) شجاع خانزادہ نے انکشاف کیا ہے کہ بھارتی خفیہ ایجنسی “را” نے پاکستان میں عالمی کرکٹ کی بحالی روکنے کے لئے ہر ممکن کوشش کی اور “را” کے افسر نے زمبابوین ٹیم کے منیجر کو دھمکی آمیز ایس ایم ایس بھی بھیجا تھا۔ پنجاب اسمبلی کے بجٹ اجلاس کے دوران صوبائی وزیرداخلہ کرنل (ر) شجاع خانزادہ نے اظہارخیال کرتے ہوئے انکشاف کیا کہ زمبابوین کرکٹ ٹیم دورہ پاکستان کے لئے جب دبئی پہنچی تو وہاں ٹیم منیجر کو بھارتی خفیہ ایجنسی کے افسر نے دھمکی آمیز ایس ایم ایس بھیجا جس میں کہا گیا کہ اگر وہ پاکستان گئے تو زندہ سلامت واپس نہیں لوٹیں گے اور دھمکی میں یہ بھی کہا گیا کہ اگر وہ پاکستان پہنچے تو ان کے گلے کاٹ دیئے جائیں گے۔

(جاری ہے)

انہوں نے بتایا کہ پاکستانی حساس اداروں نے جب تحقیقات کیں تو معلوم ہوا کہ جس نمبرسے زمبابوین ٹیم منیجر کو ایس ایم ایس موصول ہوا وہ دہلی میں “را” کے افسر کا ہے۔شجاع خانزادہ کا کہنا تھا کہ “را” کی جانب سے مہمان ٹیم کو دھمکی آمیز پیغام سے متعلق دفترخارجہ کو بھی آگاہ کردیا گیا تھا جس کے بعد زمبابوین ٹیم کو صدر مملکت کی سیکیورٹی کے برابر سیکیورٹی فراہم کی گئی جب کہ پاک زمبابوے دوسرے ایک روزہ میچ کے دوران گراوٴنڈ کے باہر ہونے والے خود کش دھماکے میں بھی بھارتی خفیہ ایجنسی “را” ہی ملوث ہے۔