کراچی ہمارا اپنا ہے یہاں آنے کیلئے الطاف حسین کی دعوت کی ضرورت نہیں، ریحام خان

جمعرات 9 اپریل 2015 04:18

کراچی(اُردو پوائنٹ اخبارآن لائن۔9 اپریل۔2015ء) چیرمین تحریک انصاف عمران خان کی اہلیہ ریحام خان کا کہنا ہے کہ سنا ہے الطاف حسین کی طرف سے مجھے کراچی آنے کی دعوت دی گئی ہے لیکن میں اپنے بھائی بہنوں کی دعوت پر آرہی ہوں۔ تحریک انصاف کی جانب سے ریحام خان کو این اے 246 کی انتخابی مہم میں شامل کرنے کے فیصلے کے بعد انہوں نے کراچی آنے کا اعلان کیا ہے جب کہ ایم کیوایم کے قائد الطاف حسین کی جانب سے کراچی آنے کی دعوت پر اپنے رد عمل کا اظہار کرتے ہوئے ان کا کہنا تھا کہ کراچی ہمارا اپنا ہے میں لیاقت آباد اور عزیز آباد کے بھائیوں اور بہنوں کی دعوت پر یہاں آرہی ہوں جب کہ سنا ہے کہ الطاف حسین کی جانب سے بھی مجھے کراچی آنے کی دعوت دی گئی ہے لیکن مجھے یہاں آنے کے لیے کسی اور کی دعوت اور حوصلہ افزائی کی ضرورت نہیں۔

(جاری ہے)

ریحام خان کا کہنا تھا کہ ذاتی مصروفیات کی بنا پر عمران خان کے ساتھ کراچی نہیں آسکی تاہم آج تمام مصروفیات چھوڑ کر کراچی پہنچوں گی کیونکہ جتنی اپنائیت سے مجھے بلایا گیا ہے اسے کس طرح رد کرسکتی ہوں۔ انہوں نے کہا کہ کراچی ہمارا اپنا ہے اور حلقہ 246 میں رہنے والے لوگ بھی ہمارے ہیں تو ہمیں ان سے گھبرانے کی کوئی ضرورت نہیں۔ واضح رہے کہ الطاف حسین کی جانب سے عمران خان کو ان کی اہلیہ ریحام خان کو بھی کراچی لانے کی دعوت دی گئی تھی جب کہ متحدہ کے قائد کی جانب سے پھولوں کی پتیاں نچھاور کرنے کا بھی اعلان کیا گیا ہے۔