پاکستان اور بھارت کے درمیان350کروڑ روپے کا تنازع حل کے قریب پہنچ گیا ، دو نو ں مما لک کے درمیان نظام آف حیدر آباد کی رقم کی اس پیچیدہ قانونی جنگ میں181سال کی تاریخ رکھنے والا برطانوی بینک بھی شامل، رقم کی اب حتمی فیصلہ لندن ہائی کورٹ کریگی

جمعہ 23 جنوری 2015 06:51

نئی دہلی( اُردو پوائنٹ اخبارآن لائن۔23جنوری۔2015ء )بھارتی میڈیا کے مطابق 1948میں لندن میں پاکستانی ہائی کمشنر کے اکاؤنٹ میں نظام آف حیدر آباد کی طرف سے 10 ہزار پونڈ کی منتقلی کا تنازع اب حل ہونے کے قریب ہے۔ حال ہی میں لندن ہائیکورٹ میں اس رقم کے دعوے داروں کے مقدمے کی سماعت ہوئی۔ دونوں ممالک 65برس تک سفارتی بات چیت سے اس رقم کے تنازع کو حل کرنے میں ناکام رہے۔

برطانوی بینک نیٹ ویسٹ لندن میں 67 سال سے 10 ہزار پونڈ اب 3 کروڑ 50لاکھ پونڈ( تین سو پچاس کروڑ روپے) ہو چکے ہیں۔بھارتی اخبار”احمد آباد مرر، پونے مرر“ کی رپورٹ کے مطابق پاکستان اور بھارت کے درمیان نظام آف حیدر آباد کی رقم کی اس پیچیدہ قانونی جنگ میں181سال کی تاریخ رکھنے والا برطانوی بینک بھی شامل ہے۔

(جاری ہے)

یہ تنازع 67سال قبل اس وقت شروع ہوا جب لندن میں پاکستان کے ہائی کمشنر کے اکاؤنٹ میں10 ہزارپونڈ جمع کرائے گئے ، اس رقم کو بعد میں واپس لینے کا مطالبہ کردیا گیا۔

اس رقم کے تنازع کو دونوں ممالک پاکستان اور بھارت کی سفارتی بات چیت نے مزید الجھا دیا۔رپورٹ کے مطابق20ستمبر1948میں نظام آف حید ر آباد کے وزیر خزانہ نواب معین نواز جنگ نے10 ہزار پونڈ ویسٹ منسٹر بینک لمیٹڈ میں حبیب ابراہیم رحیم تولہ کے اکاؤنٹ میں منتقل کیے، جو اس وقت لندن میں پاکستانی ہائی کمشنر تھے۔ایک ہفتے کے بعد نظام نے اس رقم کی منتقلی کوواپس کرنے کی درخواست کی کہ یہ رقم ان کی منظوری کے بغیر دی گئی۔

جسے بینک نے مسترد کردیا تھا۔ بات چیت میں ڈیڈلاک کے بعد نظام نے 1954میں بینک اور رحیم تولہ کے خلاف برطانیہ میں قانونی کارروائی کا آغاز کیا۔یہ معاملہ ہاؤس آف لارڈ ز میں گیا ،تاہم رحیم تولہ کے طرف سے دلائل کو قبول کیا گیا کہ نظام ان کے خلاف قانونی کارروائی نہیں کرسکتا۔ یہ پاکستان کی خودمختار حیثیت کی خلاف ورزی ہوگی۔اس تنازع کا حل صرف سفارتی بات چیت سے ممکن تھا۔

دونوں ممالک کے کشیدہ تعلقات کی وجہ سے کسی نتیجہ پر نہ پہنچا جا سکا۔اصل رقم پر سود جمع ہوتا رہا۔ بینک کا کہنا تھا کہ اس مسئلے کا حل پاکستان،بھارت اور نظام کے پوتوں شہزادہ مکرم اور مفاکہم کی طرف سے مشترکہ ہدایات کی روشنی میں ہوسکتاہے۔ 2013ء میں پاکستان کی طرف سے بینک کیخلاف قانونی کارروائی کا آغاز کیا گیا اور رضاکارانہ طور پر اس مقدمے میں استحقاق کو چھوڑا گیا۔جس سے عدالت نے مقدمے کی کارروائی کا آغاز کیا۔ لندن ہائی کورٹ کے جسٹس ہنڈرسن نے16جنوری کو اس مقدمے کی سماعت کی۔ اب اس رقم کے تنازع کا فیصلہ ہائیکورٹ کریگی جسے دونوں ممالک 65سال میں طے نہ کرسکیں اب آئندہ برسوں میں اس کا فیصلہ ہو جائیگا۔

متعلقہ عنوان :