سندھ اسمبلی میں عمران خان کے بیان کیخلاف مذمتی قرار داد منظور کرلی گئی ،عمران خان سندھ کے باسیوں سے فوری معافی مانگیں بصورت دیگر انہیں بنی گالہ سے نہیں نکلنے دیں گے،نثار کھوڑو

جمعرات 20 نومبر 2014 07:37

کراچی(اُردو پوائنٹ اخبار آن لائن۔20نومبر۔2014ء) سندھ اسمبلی نے پیپلزپارٹی کی جانب سے عمران خان خان کے خلاف سندھ کیعوام کوغلام کہنے پر مذمتی قرارمنظورکرلی۔ نجی ٹی وی کے مطابق پیپلزپارٹی کے سینئر وزیر نثار کھوڑو نے عمران خان کے خلاف مذمتی قرارداد پیش کی جس میں کہا گیا ہے کہ سندھ کے لوگوں کے غلام کہنا قابل مذمت ہے جبکہ عمران خان کا بیان ان کی ذہنی پستی کا عکاس ہے۔

اسمبلی میں اظہار خیال کرتے ہوئے نثار کھوڑو نے کہا کہ سابق جنرل پرویز مشرف کے لئے ووٹ مانگنے والے عمران خان کا کیا کہیں انہوں نے سندھ کے عوام کے شعور پر حملہ کیا اور وہ سندھی عوام کو اپنا غلام بنانے کی کوشش کر رہے ہیں، عمران شاہ محمود قریشی سے کیوں نہیں کہتے کہ اپنے مریدوں سے کہیں کہ ہاتھ پیر نہ چھوو۔

(جاری ہے)

انہوں نے کہا کہ سرمایہ داری کا طعنہ دینے والا خود جہاز کے بغیر اڑان نہیں بھرتا، سندھ کے عوام کو گالی دی جارہی ہے جو ناقابل برداشت ہے، عمران خان سندھ کے باسیوں سے فوری معافی مانگیں بصورت دیگر انہیں بنی گالہ سے نہیں نکلنے دیں گے۔

اجلاس کے دوران متحدہ قومی موومنٹ کے رہنما فیصل سبزواری نے قرارداد پر اظہار خیال کرتے ہوئے کہا کہ عمران خان کے بیان سے سندھ کے باسیوں کی دل آزاری ہوئی اس لئے ان الفاظ کو فوری واپس لیا جانا چاہیئے۔ انہوں نے کہا کہ سیاستدانوں کو برا کہنے والے ہی آج سیاست کے شہہ سوار بنے ہوئے ہیں، سیاسی مخالفت اپنی جگہ کسی کوعوام دشمن قراردینا اورالزام تراشی مناسب نہیں اس لئے سب کو احتیاط کا مظاہرہ کرنا ہوگا۔