سپیکر قومی اسمبلی کسی کے اشاروں کی بجائے قانون کے مطابق تحریک انصاف کے استعفے منظور کرے، استعفوں سے کوئی بحران نہیں آئیگا، فضل الرحمن ،دھرناوالے ایسے ناکام ہوئے کہ انہیں اب کوئی احتجاج ختم کرنے کو بھی نہیں کہہ رہا، رسوائی چھپانے کیلئے جلسوں کا سہارا لے رہے ہیں، مڈم ٹرم انتخابات کا کوئی امکان نہیں،دھرنوں کی سیاست جاری رہنے کی صورت میں کشمیر کی جنگ نہیں جیت سکیں گے ، ضرب عضب آپریشن میں اب تک 8سے 10 جنگجوہی مارے گئے، بتایا جائے کب تک متاثرین گھروں کوواپس جائینگے، کوئی بتائے کہ ملالہ نے تعلیم کی کیا خدمت کی، نوبل انعام ملالہ نہیں مغربی تہذیب کو دیاگیا، میڈیا بھی ذمہ داری کا مظاہرہ کرے، اپنی نظریات وتہذیب پر کوئی سمجھوتہ نہیں کرینگے، ایم ایم اے بحالی کیلئے فی الوقت کوئی رابطے نہیں ہوئے،پرویز خٹک کیخلاف تحریک عدم اعتماد کامیاب کرائینگے، ن لیگ سے بھی بات چیت چل رہی ہے، جاوید ہاشمی نے سازش ناکام بنادی، انتخابات کیلئے باغی کی سٹرٹیجی درست نہیں تھی،امریکہ و مغرب صرف مسلمانوں کو ہی دہشت گرد قرار دیتاہے، انہیں اسرائیل و بھارت کے مظالم کیوں نظر نہیں آتے، امریکہ کی چھتری کے نیچے چین کیخلاف دہشتگرد تیار ہورہے ہیں، سربراہ جے یو آئی (ف) کی غیر رسمی گفتگو
اسلام آباد(اُردو پوائنٹ اخبار آن لائن۔18اکتوبر۔2014ء) جمعیت علمائے اسلام (ف) کے سربراہ مولانافضل الرحمن نے کہاہے کہ سپیکر قومی اسمبلی کسی کے اشاروں کی بجائے قانون کے مطابق تحریک انصاف کے استعفے منظور کرے، استعفوں سے کوئی بحران نہیں آئیگا، دھرناوالے ایسے ناکام ہوئے کہ انہیں اب کوئی احتجاج ختم کرنے کو بھی نہیں کہہ رہا، رسوائی چھپانے کیلئے جلسو ں کا سہارا لے رہے ہیں، مڈم ٹرم انتخابات کا کوئی امکان نہیں، دھرنے کی سیاست جاری رہی تو پھر ہم کشمیرکی جنگ نہیں جیت سکیں گے، ضرب عضب آپریشن میں اب تک 8سے 10 جنگجوہی مارے گئے، بتایا جائے کب تک متاثرین گھروں کوواپس جائینگے، کوئی بتائے کہ ملالہ نے تعلیم کی کیا خدمت کی، نوبل انعام ملالہ نہیں مغربی تہذیب کو دیاگیا، میڈیا بھی ذمہ داری کا مظاہرہ کرے، اپنی نظریات وتہذیب پر کوئی سمجھوتہ نہیں کرینگے، ایم ایم اے بحالی کیلئے فی الوقت کوئی رابطے نہیں ہوئے،پرویز خٹک کیخلاف تحریک عدم اعتماد کامیاب کرائینگے، ن لیگ سے بھی بات چیت چل رہی ہے، جاوید ہاشمی نے سازش ناکام بنادی، انتخابات کیلئے باغی کی سٹرٹیجی درست نہیں تھی،امریکہ و مغرب صرف مسلمانوں کو ہی دہشت گرد قرار دیتاہے، انہیں اسرائیل و بھارت کے مظالم کیوں نظر نہیں آتے، امریکہ کی چھتری کے نیچے چین کیخلاف دہشتگرد تیار ہورہے ہیں۔
(جاری ہے)
مولانافضل الرحمن خلیل کو امریکہ کی جانب سے دہشت گرد قرار دیئے جانے اور پابندیاں عائد کرنے بارے سوال کے جواب میں مولانافضل الرحمن نے کہاکہ امریکہ کو اسرائیل اور بھارت کی دہشت گردی کیوں نظر نہیں آتی لیکن ایسا لگتاہے کہ مغرب کے سامنے دہشت گرد ہونے کیلئے مسلمان ہونا ضروری ہے۔ انہوں نے کہاکہ دہشت گردی کا واویلا کرنیوالا امریکہ خود چین کے خلاف دہشت گرد اپنی چھتری تلے پال رہاہے جنہیں نہ بھارتی فوجیوں کی فائرنگ کا خدشہ ہے اور نہ ہی امریکی ڈرونز انہیں نشانہ بناتے ہیں چین اس کیمپ کے باعث ہی پاکستان سے سراپا احتجاج ہے فضل الرحمن خلیل کا بھی یہی قصور ہے کہ اس نے چین کیخلاف استعمال ہونے سے انکار کردیاہے۔
آپریشن ضرب عضب بارے سوال کے جواب میں مولانافضل الرحمن نے کہاکہ بہتر ہوگا اس معاملے پر عالمی اداروں سے رائے لی جائے ہماری اطلاعات کے مطابق اب تک صرف 8 سے 10 جنگجو ہی مارے گئے ، اب وہاں کوئی نہیں ہے لوگوں کو اس خاطر واپس نہیں جانے دیا جارہاکہ کھنڈرات کو تعمیرات کے بعد آباد کیا جائیگا لیکن بتایا تو جائے کب تک یہ کھنڈرات تعمیر ہوجائینگے۔ انہوں نے ایک اور سوال پر کہاکہ پاکستان تحریک انصاف کے ناچ دھرنا نے اسلامی تہذیب کا جنازہ نکال دیاہے کیا جماعت اسلامی جوکہ خود کو مذہبی تنظیم کہتی ہے اسے جنسی آلودگی نظر نہیں آتی ایم ایم اے دور میں چند اشتہاری بورڈز پختونخواہ میں توڑنے والوں کو اب فیصلہ کرنا چاہیے کہ کیا وہ اب بھی اس مدرپدر آزاد خیال جماعت کے اتحادی رہیں گے، احتجاجی دھرنوں میں جاری مغربی تہذیب کو ترویج دی جارہی ہے جس تہذیب کا کوئی نظریہ یا سند نہ ہو وہ بے نصب ہوتی ہے اور ایسی کسی تہذیب کو نہیں مانتے۔ وزیراعلیٰ پرویز خٹک کیخلاف عدم اعتماد کے سوال کے جواب میں مولانافضل الرحمن نے کہاکہ 23 تاریخ کو صوبائی اسمبلی کا اجلاس ہورہاہے عدم اعتماد بارے مسلم لیگ( ن) سے بھی مشاورت کررہے ہیں اب ن لیگ کو بھی فیصلہ کرنا چاہیے کہ جس طرح کی زبان پی ٹی آئی یا وزیراعلیٰ کے پی کے کی جانب سے استعمال کی گئی کیا وہ وفاق کے ساتھ چل سکتے ہیں تحریک عدم اعتماد کو کامیاب کرائینگے مطلوبہ نمبرز بھی پورے ہوجائینگے۔ بعد ازاں ”خبر رساں ادارے“ سے گفتگو کرتے ہوئے مولانافضل الرحمن نے کہاکہ متحدہ مجلس عمل کی بحالی کیلئے فی الوقت کوئی رابطے نہیں ہوئے ہیں وہ حج بیت اللہ کے بعد واپس آئے ہیں البتہ حج پر جانے سے قبل کسی جانب سے ان سے کوئی رابطہ نہیں ہوا تھا۔ انہوں نے کہاکہ جاوید ہاشمی نے سازش کو اپنے استعفے کے ذریعے ناکام بنادیا اور جرات مندی کا مظاہرہ کیا البتہ ان کی انتخابات کی سٹرٹیجی درست نہیں تھی جس کے باعث وہ شکست کھاگئے باغی کے سیاسی مستقبل کے حوالے سے جاوید ہاشمی خود کی بتاسکتے ہیں۔مزید متعلقہ خبریں پڑھئیے :
