ایوان صدر اوروزیراعظم ہاوٴس کا روزانہ کا خرچہ 50 لاکھ روپے ہے، عمران خان،پاکستان میں بہت بڑی تبدیلی کی ضرورت ہے، بھوک وافلاس میں پاکستان کا دنیا میں چھٹا نمبر ہے ، ہماری اکثریتی آبادی غربت کی لکیر سے نیچے زندگی گزار رہی ہے لیکن ایوان صدر اور وزیراعظم ہاوٴس کا روزانہ کا خرچہ لاکھوں روپے ہے، حکمرانوں کا رہن سہن انتہائی شرمناک ہے،لاہور میں ایک تقریب سے خطاب

ہفتہ 28 جون 2014 08:16

لاہور(اُردو پوائنٹ اخبار آن لائن۔28جون۔2014ء ) پاکستان تحریک انصاف کے چیرمین عمران خان نے کہا ہے کہ ہمارے حکمران اقتدار میں اس لئے آتے ہیں تاکہ وہ دولت بنا سکیں۔

(جاری ہے)

لاہور میں ایک تقریب سے خطاب کرتے ہوئے چیرمین تحریک انصاف عمران خان کا کہنا تھاکہ اقتدار کی ذمے داری سے انسانیت کو فائدہ پہنچایا جاسکتا ہے لیکن ہمارے حکمران اقتدار میں اس لئے آتے ہیں کہ وہ نہ صرف دولت بنا سکیں بلکہ اس میں مسلسل اضافہ کرتے رہیں، اگر صرف ایک چیز دیکھ لی جائے کہ اقتدار میں آنے سے پہلے حکمرانوں کے اثاثے کیا تھے اور اور آج کیا تو اس بات کا صاف پتہ چل جائے گا کہ ان کا مقصد کیا ہے۔

عمران خان نے کہاکہ بھوک وافلاس میں پاکستان کا دنیا میں چھٹا نمبر ہے جب کہ بھوک کی وجہ سے پیدا ہونے والی بیماری میں سب سے پہلے نمبر پرآتا ہے، ہماری اکثریتی آبادی غربت کی لکیر سے نیچے زندگی گزار رہی ہے لیکن ایوان صدر اور وزیراعظم ہاوٴس کا روزانہ کا خرچہ لاکھوں روپے ہے، حکمرانوں کا رہن سہن انتہائی شرمناک ہے