عوامی تحریک کے زیر اہتمام آج قومی کانفرنس منعقد ہو گی،تحریک انصاف، پیپلز پارٹی، ق لیگ، جماعت اسلامی اور مذہبی جماعتیں شریک ہونگی

اسلام آباد(اُردو پوائنٹ اخبارتازہ ترین - آئی این پی۔ 21 فروری2017ء) پاکستان عوامی تحریک کے زیر اہتمام انصاف کی فراہمی، دہشتگردی اور کرپشن کے خاتمے میں اداروں کا کردار کے عنوان سے قومی کانفرنس آج 22 فروری بروز بدہ مرکزی سیکرٹریٹ ماڈل ٹائون لاہور میںمنعقد ہو گی۔ اسلام آباد میڈیاسیل کے مطابق قومی کانفرنس کی صدارت عوامی تحریک کے سینئر مرکزی رہنما اور صدرمنہاج القرآن ڈاکٹر حسین محی الدین کرینگے،جبکہ کانفرنس میں تحریک انصاف، پیپلز پارٹی، ق لیگ، جماعت اسلامی، سنی اتحاد کونسل، عوامی مسلم لیگ، مجلس وحدت المسلمین سمیت اپوزیشن کی دیگر جماعتیں شریک ہونگی۔

قومی کانفرنس کے حوالے سے سیکرٹری جنرل خرم نواز گنڈاپور نے گفتگو کرتے ہوئے کہا کہ اس وقت پاکستان اور اس کے عوام کے بڑے مسائل انصاف کی عدم فراہمی، دہشتگردی اور کرپشن کا خاتمہ ہے۔

(جاری ہے)

ہم سمجھتے ہیں کہ ملکی مسائل کے حل کیلئے حکمران کوئی ویژن اور پالیسی نہیں دے سکے ۔پنجاب میں رینجرز آپریشن کی راہ میں روڑے اٹکائے جارہے ہیں جس کی وجہ سے عوام کا جان و مال دہشتگردوں کے رحم و کرم پر ہے۔

ہر روز دھماکے ہورہے ہیں جبکہ حکمران جمع تفریق سے آگے نہیں بڑھ رہے۔ حکومت کا وجود سپریم کورٹ کے احاطے میں پاناما لیکس کے بعد ہونے والی میڈیا بریفنگ کے سوا اور کہیں نظر نہیں آرہا۔ سانحہ ماڈل ٹائون کے شہداء کے ورثاء 27 ماہ بعد بھی انصاف کے منتظر ہیں۔ پانامہ لیکس پر بھی وزیراعظم اپنے خاندان پر لگنے والے الزامات کا قطری خط کے سوا کوئی جواب نہیں دے سکے۔ پراپیگنڈا کے ذریعے انصاف کا گلا گھونٹنے کی کوشش کی جارہی ہے۔ انہوں نے کہا کہ مذکورہ مسائل کے حل اور متفقہ لائحہ عمل کے لیے قومی قیادت آج سر جوڑ کر بیٹھے گی ہم سمجھتے ہیں جب تک حکمرانوں پر عوام اپنا دبائو نہیں بڑھائیں گے ملکی سلامتی خطرات سے دوچار رہے گی۔