Live Updates

تحریک انصاف کا وزیر اعلی پنجاب کی نا اہلی کے لئے عدالت سے رجوع کرنے کا فیصلہ

سپیکر کے جانبدارانہ رویے کیخلاف آئندہ اسمبلی اجلاس میں شدید احتجاج کیا جائیگا‘محمود الرشید کی زیر صدارت پارلیمانی پارٹی کا اجلاس

منگل 21 فروری 2017 20:10

تحریک انصاف کا وزیر اعلی پنجاب کی نا اہلی کے لئے عدالت سے رجوع کرنے ..
لاہور(اُردو پوائنٹ اخبارتازہ ترین - این این آئی۔ 21 فروری2017ء) پنجاب اسمبلی میں قائد حزب اختلاف میاں محمود الر شید کی زیر صدارت تحریک انصاف کی پارلیمانی پارٹی کا اجلاس ہوا جس میں وزیر اعلی پنجاب شہباز شریف کی نا اہلی کے لئے عدالت سے رجوع کرنے کا فیصلہ کر لیا گیا، نا اہلی ریفرنس پر سپیکر کے جانبدارانہ رویے کیخلاف آئندہ اسمبلی اجلاس میں شدید احتجاج کیا جائیگا۔

اجلاس میں زیر تعمیر خان پور ہائیڈرو پاور پاور پراجیکٹ کے گرنے کی تحقیقات حاضر سروس جج سے کرانے کا بھی مطالبہ کیا گیا۔ پنجاب اسمبلی اپوزیشن چیمبر میں ہونے والے اجلاس میں ڈپٹی اپوزیشن لیڈر سبطین خان، احمد خان بچھڑ، ملک آصف محمود، شعیب صدیقی، ڈاکٹر نوشین حامد، سعدیہ سہیل، شنیلا روتھ ودیگر اراکین اسمبلی نے شرکت کی۔

(جاری ہے)

اجلاس میں چارسدہ دھماکے کی مذمت اور قیمتی جانوں کے ضیاع پر اظہار افسوس کیا گیا، اس موقع پر شہدا کیلئے دعا اور قوم کو ایک اور بڑے سانحہ سے بچانے پر چار سدہ پولیس کو خراج تحسین پیش کیا گیا۔

پارلیمانی پارٹی اجلاس کے بعد احاطہ اسمبلی میں میڈیا سے بات چیت کرتے ہوئے میاں محمود الر شید نے کہا کہ سپیکر رانا اقبال نے اپنی نوکری بچانے اور حکمرانوں کی شاباش وصول کرنے کیلئے اپنے منصب سے نا انصافی کی اور اپنے حلف کی خلاف ورزی کرتے ہوئے پنجاب کے عوام کو مایوس کیا۔ انہوں نے کہا کہ ریفرنس عدالتی احکامات کی روشنی میں پنجاب اسمبلی میں دائر کیا گیا، واضح عدالتی فیصلے اور احکامات کے باوجود سپیکر اسمبلی کو ریفرنس مسترد کر نے کا کوئی جواز نہیں بنتا تھا، سپیکر نے سردار ایاز صادق کے نقش قدم پر چلتے ہوئے عوامی مفادات کے برعکس کام کیا۔

میاں محمود الر شید نے خان پور ہائیڈرو پاور پراجیکٹ نہر بدر ہو جانے کی تحقیقات حاضر سروس جج سے کرانے کا مطالبہ کرتے ہوئے وزیر اعلی پر شدید تنقید کی، انہوں نے کہا کہ خان پور ہائیڈرو پاور پراجیکٹ پر سوا دو ارب روپے سے زائد خرچ کیا گیا اور نہر میں پانی چھوڑتے ہی پلانٹ ساز و سامان اور مشینری سمیت بہہ گیا، قوم کے پیسے کو اپنی انا کی نذر کرنے والے شہباز شریف بتائیں اب اس نقصان کو کون پورا کرے گا، انہوں نے کہا کہ معاملے کی حاضر سروس جج سے تحقیقات کرائی جائیں۔
Live پاکستان تحریک انصاف سے متعلق تازہ ترین معلومات