کے الیکٹرک نے شمسی توانائی سے بجلی بنانے والی کمپنی آرسن سے بجلی خریدنے کا معاہدہ کرلیا

آرسن پاکستان کی جانب سے ٹھٹہ میں لگایا جانے والا 50 میگا واٹ کا سولر پاور پروجیکٹ 2018 تک پیداوار شروع کردے گا،کے الیکٹرک 2009 کے بعد سے اپنی پیداواری صلاحیت کو بہتر بنانے کیلئے 1.2 ارب ڈالرز کی سرمایہ کاری کرچکی ہے جبکہ اس نے اپنی پیداواری صلاحیت میں 1037 میگا واٹ بجلی کا اضافہ بھی کیا ہے،ترجمان کے الیکٹرک

منگل 21 فروری 2017 19:46

کراچی (اُردو پوائنٹ اخبارتازہ ترین - آئی این پی۔ 21 فروری2017ء) کراچی کو بجلی فراہم کرنے والی کمپنی کے الیکٹرک نے اپنی پیداواری استعداد میں اضافے کے لیے شمسی توانائی سے بجلی بنانے والی کمپنی آرسن پاکستان لمیٹڈ سے بجلی خریدنے کا معاہدہ کرلیا۔تفصیلات کے مطابق کے الیکٹرک نے آرسن پاکستان لمیٹڈ سے بجلی کی خریداری کا 25 سالہ معاہدہ کیا ہے ۔

ترجمان کے الیکٹرک نے بتایا کہ آرسن پاکستان کی جانب سے سندھ کے ضلع ٹھٹہ میں لگایا جانے والا 50 میگا واٹ کا سولر پاور پروجیکٹ 2018 تک پیداوار شروع کردے گا۔انہوں نے مزید کہا کہ کے الیکٹرک 2009 کے بعد سے اپنی پیداواری صلاحیت کو بہتر بنانے کے لیے 1.2 ارب ڈالرز کی سرمایہ کاری کرچکی ہے جبکہ اس نے اپنی پیداواری صلاحیت میں 1037 میگا واٹ بجلی کا اضافہ بھی کیا ہے۔

(جاری ہے)

دوسری جانب آرسن پاکستان لمیٹڈ کے ترجمان نے بھی معاہدے کی تصدیق کرتے ہوئے بتایا کہ سولر فوٹو وولٹائیک پاور جنریشن ماحول دوست ہے اور ان کی کمپنی ماحول دوست بجلی کی پیداوار میں اضافے کے لیے کوشاں ہے۔انہوں نے کہا کہ کے الیکٹرک کے ساتھ ہمارا اشتراک صارفین کو قابل تجدید توانائی پہنچانے کے سلسلے کی ایک کڑی ہے۔خیال رہے کہ دیگر ممالک کی طرح پاکستان میں بھی ماحول دوست بجلی کا رجحان بڑھ رہا ہے اور بڑی کمپنیاں توانائی کے قابل تجدید ذرائع سے بجلی کے حصول کے لیے کوشاں ہے جن میں شمسی توانائی، پن بجلی اور ہوا کے زور سے بجلی بنانے کے پروجیکٹس شامل ہیں۔

گزشتہ دنوں دبئی کے ابراج گروپ نے بھی سندھ میں ہوا کے زور پر چلنے والے توانائی کے 50 میگاواٹ کے پروجیکٹ کے حصص خریدنے کا اعلان کیا تھا۔ابراج گروپ کی جانب سے جاری اعلامیے میں کہا گیا تھا کہ جھمپر ونڈ کوریڈور ہوا کے زور پر چلنے والے منصوبے کے لیے بنایا گیا ہے جس میں 550 میگاواٹ باقاعدہ فعال ہے اور مزید ایک گیگا واٹ تکمیل کے مراحل میں ہے۔