سال 2015ء میں پاکستانی شوبز کی مشہور کامیڈی فلم ’’جوانی پھر نہیں آنی‘‘ کی کامیابی کے بعد سیکوئل کی تیاریاں،حمزہ علی عباسی کی جگہ فہد مصطفیٰ اداکاری کے جوہر دکھائیں گے

لاہور ۔ (اُردو پوائنٹ اخبارتازہ ترین - اے پی پی۔ 21 فروری2017ء) سال 2015ء میں پاکستانی شوبز کی مشہور کامیڈی فلم ’’جوانی پھر نہیں آنی‘‘ کی کامیابی کے بعد سیکوئل کی تیاریاں کی جارہی ہیں تاہم اس فلم کے سیکوئل میں حمزہ علی عباسی کی جگہ معروف میزبان اور اداکار فہد مصطفی اداکاری کے جوہر دکھائیں گے۔ فلم کی شوٹنگ رواں سال مارچ میں شروع ہو جائے گی۔

(جاری ہے)

فلم کی کہانی کے مصنف واسع چوہدری نے اپنے انسٹاگرام اکاو نٹ پر اس پیش رفت سے متعلق شائقین کو آگاہ کیا اور مزید حیران کن بات یہ ہے کہ پہلی فلم میں بہترین اداکاری کرنے والی سوہائے علی ابڑو بھی سیکوئل کا حصہ نہیں ہوں گی۔ واسع چوہدری نے ہمایوں سعید، فہد مصطفی اور احمد بٹ کے ساتھ ایک تصویر بھی اپ لوڈ کی اور پیغام میں کہا کہ ’’ تو جوانی پھر نہیں آنی 2 کچھ اس طرح نظر آئے گی، فہد مصطفی! میں کہتا ہوں ایک بار پھر سوچ لو۔‘‘پروڈیوسر ہمایوں سعید اور ندیم بیگ کی ہدایات میں بننے والی ’’جوانی پھر نہیں آنی‘‘ کی کامیابی کے بعد شائقین شدت سے اس کے سیکوئل کا انتظار کر رہے تھے جس کا اعلان ہونے پر سب خوش ہیں اور نئی کاسٹ کے بارے میں بھی اپنی اپنی رائے کا اظہار کر رہے ہیں۔