آسٹریلیا میں بچوں کا جنسی استحصال، کلیسا نے 276 ملین ڈالر ادا کر دیئے

کینبرا ۔ (اُردو پوائنٹ اخبارتازہ ترین - اے پی پی۔ 17 فروری2017ء) آسٹریلیا میں کیتھولک چرچ نے ماضی میں جنسی زیادتیوں کا شکار ہونے والے افراد کو زر تلافی ادا کرنا شروع کر دیا ہے۔جرمن ذرائع ابلاغ کے مطابق کلیسا نے یہ زر تلافی تقریباً ہر اٴْس متاثرہ شخص کو دیا ہے، جس نے جنسی زیادتی کی شکایت درج کرائی تھی۔جنسی زیادتی کا شکار ہونے والے افراد میں آسٹریلوی کیتھولک چرچ نے مجموعی طور پر 213 ملین امریکی ڈالر کے برابر (276 ملین آسٹریلوی ڈالر) بطور زر تلافی تقسیم کیے ہیں۔

اوسطاًہر متاثرہ شخص کو اکانوے ہزار آسٹریلین ڈالر دیے گئے ہیں۔ اس ضمن میں مکمل کی گئی ایک تحقیقاتی رپورٹ میں اس زر تلافی کی ادائیگی کی تفصیلات جاری کی گئی ہیں۔اس تفتیشی رپورٹ کو مرتب کرنے والے رائل کمیشن میں شامل استغاثہ کے ایک وکیل بیرسٹر گیل فرنیس کے مطابق چرچ نے 1980ء سے لے کر 2015ء تک زر تلافی کی ادائیگی کا سلسلہ جاری رکھا۔

(جاری ہے)

پادریوں اور دیگر کلیسائی شخصیات کی جانب سے کی گئی جنسی زیادتیوں کے ان واقعات نے آسٹریلوی معاشرے کو جھنجھوڑ کر رکھ دیا تھا۔

رواں ماہ کے اوائل میں 4400 سے زائد افراد نے دعویٰ کیا تھا کہ انہیں بھی بچپن میں جنسی استحصال کا نشانہ بنایا گیا تھا۔ یہ تعداد اٴْن 30 ہزار سے زائد افراد کی ہے، جن کو تلافی کے طور پر کیتھولک چرچ نے ادائیگی کر دی ہے۔ ابھی کئی سو دیگر متاثرین کے دعووں کی چھان بین کی جا رہی ہے۔