وال اسٹریٹ جنرل نے پاکستان اسٹاک ایکسچینج کو دنیا کی 5ویں بہترین اسٹاک مارکیٹ قراردے دیا

منگل 14 فروری 2017 17:35

وال اسٹریٹ جنرل نے پاکستان اسٹاک ایکسچینج کو دنیا کی 5ویں بہترین اسٹاک ..
کراچی(اُردو پوائنٹ اخبارتازہ ترین - این این آئی۔ 14 فروری2017ء) امریکی اخبار وال اسٹریٹ جنرل نے پاکستان اسٹاک ایکسچینج کو دنیا کی 5 ویں بہترین اسٹاک مارکیٹ قراردیتے ہوئے کہاہے کہ امن وامان کی صورت حال میں بہتری سے معاشی ترقی ، جمہوریت کے استحکام میں مدد ملی ہے جبکہ متوسط طبقہ کی تعداد میں بھی اضافہ ہورہا ہے۔وال اسٹریٹ جنرل کی رپورٹ کے مطابق پی ایس ایکس دنیا کی پانچویں بڑی اسٹاک مارکیٹ بن چکی ہے، پاکستان کی جی ڈی پی گروتھ گزشتہ 8 سال کی بلند ترین سطح 5 فیصد سے بڑھ چکی ہے ،جبکہ رواں سال شرح نمو میں 5.4 فیصد کا اضافہ متوقع ہے۔

وال اسٹریٹ جنرل کے مطابق سی پیک ، بنیادی ڈھانچے اور توانائی کے بڑے منصوبوں کے باعث پاکستان کی معاشی ترقی میں نمایاں اضافہ ہوا ہے، بیرون ملک مقیم پاکستانیوں کی معاشی ترقی میں نمایاں اضافہ ہوا ہے، بیرون ملک مقیم پاکستانیوں کی جانب سے بھیجی جانے والی ترسیلات زر کا حجم 20 ارب ڈالر تک بڑھ چکا ہے جس کی وجہ سے عام آدمی کی قوت خرید میں اضافہ ہوا ہے۔

(جاری ہے)

دوسری جانب سوئٹزر لینڈ کی معروف کمپنی کے چیف ایگزیکٹو برونو اولیز ہوک نے اپنے ایک بیان میں کہا کہ پاکستان میں متوسط طبقہ کی تعداد میں اضافہ کے باعث گزشتہ پانچ سال کے دوران کمپنی کی سیلز میں دو گنا اضافہ ہونے سے اس کا حجم ایک ارب ڈالر سالانہ تک بڑھ چکا ہے۔انہوں نے کہا کہ دنیا کے دیگر ممالک کے مقابلہ میں پاکستان میں معاشی ترقی اور سیاسی استحکام کے باعث مڈل کلاس میں روز بروز اضافہ ہورہا ہے۔