پاکستان اسٹاک ایکسچینج میں مندی کے بادل چھٹ گئے، تارچڑھائو کے بعد تیزی

کے ایس ای 100 انڈیکس 698.19 پوائنٹس کے اضافے سے 49455.86 پوائنٹس پر بند

بدھ 1 فروری 2017 20:40

پاکستان اسٹاک ایکسچینج میں مندی کے بادل چھٹ گئے، تارچڑھائو کے بعد تیزی
کراچی(اُردو پوائنٹ اخبارتازہ ترین - این این آئی۔ 01 فروری2017ء) پاکستان اسٹاک ایکسچینج میں مندی کے بادل چھٹ گئے، کاروباری ہفتے کے تیسرے روزاتارچڑھائو کے بعد تیزی کا رجحان رہااور کے ایس ای 100 انڈیکس 698.19 پوائنٹس کے اضافے سے 49455.86 پوائنٹس پر بند ہوا۔ مارکیٹ سرمایہ میں 1 کھرب 26 ارب 41 کروڑ 68 لاکھ 85 ہزار 566 روپے کا اضافہ ہوگیا جبکہ خرید و فروخت میں بھی 3 کروڑ 92 لاکھ 78 ہزار 950 حصص کی تیزی ریکارڈ کی گئی۔

اسی طرح تجارتی حجم میں 1 ارب 60 لاکھ 98 ہزار 429 روپے کا اضافہ رونماء ہوا۔ تفصیلات کے مطابق پی ایس ایکس میں گذشتہ دو دن کی مندی سے کاروبار حصص نے نجات حاصل کرلی اور بدھ کو شیئرز مارکیٹ کی سرگرمیوں میں اضافے کے باعث ٹریڈنگ کے دوران کے ایس ای100انڈیکس ایک بار پھر49 ہزار پوائنٹس کی بالائی نفسیاتی حد پر بحال ہو گیا۔

(جاری ہے)

اسٹاک مارکیٹ میں کاروباری سرگرمیاں عروج پر رہیں، توانائی، اسٹیل، کیمیکل، بینکنگ، گیس اور سیمنٹ سیکٹر میں خریداری کا رجحان غالب رہا۔

اسٹاک مارکیٹ ماہرین کے مطابق ایس ای سی پی کی جانب سے بروکرز پر لگائی جانیوالی پابندیاں ختم ہونے کے قریب ہیں جس کی وجہ سے سرمایہ کار ایک بار پھر مارکیٹ میں متحرک ہو گئے ہیںاور آئندہ دنوں میں مارکیٹ میں بہتری کے امکانات بھی روشن ہیں اس صورتحا ل میں مارکیٹ کا اگلا ہدف 54 ہزار پوائنٹس ہو سکتا ہے۔ کاروباری ہفتے کے تیسرے روز بدھ کو پی ایس ایکس میں تیزی کا رجحان رہا اورکے ایس ای 100 انڈیکس 48800، 48900، 49000، 49100، 49200، 49300 اور 49400 پوائنٹس کی 7 بالائی نفسیاتی حدیں عبور کرتے ہوئے 698.19 پوائنٹس کے اضافے سے 49455.86 پوائنٹس تک جاپہنچا جبکہ کے ایس ای 30 انڈیکس بھی 352.58 پوائنٹس کی تیزی سے 26655.54 پوائنٹس پر بند ہوا۔

مارکیٹ میں اتار چڑھائو کے بعد کے ایس سی آل شیئر انڈیکس 431.28 پوائنٹس کا اضافہ رونماء ہوا جبکہ کے ایم آئی 30 انڈیکس میں 1487.47 پوائنٹس کی تیزی ریکارڈ کی گئی۔ اسی طرح بینکس ٹریڈ ایبل (بی اے ٹی آئی) انڈیکس 141.32 پوائنٹس کے اضافے سے 20240.38 پوائنٹس پر بند ہوا جبکہ آئل اینڈ گیس ٹریڈ ایبل (او جی ٹی آئی) انڈیکس 44.22 پوائنٹس کی تیزی سے 18012.59 پوائنٹس پر بند ہوا۔

حصص کی خرید و فروخت میں تیزی کی وجہ سے پی ایس ایکس - کے ایم آئی انڈیکس 379.43 پوائنٹس کے اضافے سے 23583.55 پوائنٹس کی سطح پر بند ہوا۔ مارکیٹ میں مجموعی طور پر 417 کمپنیوں کے حصص کا لین دین ہوا جن میں سے 311 کمپنیوں کے حصص کی قیمتوں میں تیزی، 89 کمپنیوں کے حصص کے بھائو میں مندی اور 17 کمپنیوں کے حصص کی قیمتوں میں استحکام رہا۔ سب سے زیادہ تیزی ویتھ پاک لمیٹڈ کے حصص کی قیمتوں میں ہوئی جس کے حصص کی قیمت 205 روپے کے اضافے سے 4311 روپے پر بند ہوئی۔

اسی طرح رفحان میز پروڈکٹس کے حصص کی سودے بھی 136.97 روپے کی تیزی سے 7637 روپے پر بند ہوئے۔ سب سے زیادہ مندی سانوفیل ایونٹس اور سیمینز پاکستان ایکس ڈی کے حصص کی قیمتوں میں ہوئی۔ سانوفیل ایونٹس کے حصص کی قیمت 48.50 روپے کی مندی سے 2331.50 روپے اور سیمینز پاکستان ایکس ڈی کے حصص کی قیمت بھی 39.64 روپے کی کمی سے 938.93 روپے رہ گئی۔ سب سے زیادہ کاروبار کے الیکٹرک لمیٹڈ کے حصص میں ہوا جو 6 کروڑ 86 لاکھ 99 ہزار 500 شیئرز رہا جس کی قیمت 10.52 روپے سے شروع ہو کر 10.28 روپے پر بند ہوئی جبکہ دوست اسٹیل لمیٹڈ کے 1 کروڑ 92 لاکھ 51 ہزار 500 حصص کے سودے 13.40 روپے سے شروع ہو کر 14.13 روپے بند ہوئے۔

مجموعی طور پر 35 کروڑ 61 لاکھ 36 ہزار 400 حصص کا کاروبار ہوا جس کا تجارتی حجم 20 ارب 34 کروڑ 67 لاکھ 13 ہزار 215 روپے رہا۔ مارکیٹ کیپیٹل 97 کھرب 27 ارب 73 کروڑ 3 لاکھ 6 ہزار 538 روپے سے بڑھ کر 98 کھرب 54 ارب 14 کروڑ 71 لاکھ 92 ہزار 104 روپے ہو گیا۔ فیوچر ٹریڈنگ میں 125 کمپنیوں کے حصص کی قیمتوں میں تیزی، 8 کمپنیوں کے حصص کی قیمتوں میں مندی اور 3 کمپنیوں کے حصص کی قیمتوں میں استحکام رہا جبکہ 5 کروڑ 93 لاکھ 55 ہزار 550 حصص کا کاروبار ہوا۔

متعلقہ عنوان :