پاکستان اسٹاک ایکسچینج میںتیزی کے ایس ای ہنڈریڈ انڈیکس 435 پوائنٹس کے اضافے کے ساتھ 50 ہزار 192 پوائنٹس کی ریکارڈ سطح پر بند

میاں محمد ندیم جمعرات 26 جنوری 2017 19:07

کراچی(اردو پوائنٹ اخبارتازہ ترین-انٹرنیشنل پریس ایجنسی۔26جنوری۔2017ء) پاکستان اسٹاک ایکسچینج میں تاریخی تیزی دیکھنے میں آئی اور کے ایس ای ہنڈریڈ انڈیکس 435 پوائنٹس کے اضافے کے ساتھ 50 ہزار 192 پوائنٹس کی ریکارڈ سطح پر بند ہوا۔رواں ہفتے 24 جنوری کو بھی پاکستان اسٹاک ایکسچینج میں شدید تیزی دیکھنے میں آئی تھی اور ٹریڈنگ کے دوران کے ایس ای ہنڈرڈ انڈیکس 50 ہزار 49 کی ریکارڈ سطح پر پہنچا تھا، تاہم بعد میں انڈیکس گر گیا تھا۔

اسٹاک ایکسچینج میں اس تاریخی تیزی کی وجہ لوکل فنڈز اور بڑے ڈویژن کے انفرادی سرمایہ کاروں کا فعال ہونا ہے۔آج پاور اور سیمنٹ سیکٹر میں تیزی دیکھنے میں آئی، جس کی وجہ سے اسٹاک ایکسچینج نے نیا سنگ میل عبور کیا۔اقتصادی ماہرین کے مطابق چینی کنسورشیم کے ساتھ 40 فیصد شیئرز کی فروخت کے معاہدے کے بعد مزید سرمایہ کار متوجہ ہوں گے اور پاکستان اسٹاک ایکسچینج مزید نئے ریکارڈز بنائے گا۔

(جاری ہے)

یاد رہے کہ چینی کنسورشیم نے گزشتہ برس دسمبر میں پاکستان اسٹاک ایکسچینج کے 40 فیصد حصص خریدے تھے۔پاکستان اسٹاک ایکسچینج نے 40 فیصد شیئرز کی فروخت کے لیے عالمی سرمایہ کاروں سے بولیاں طلب کی تھیں، اور چینی کنسورشیم نے 28 روپے فی شیئر کے حساب سے سب سے زیادہ بولی دی تھی، جس کا تخمینہ 85 کروڑ ڈالر یا 8 ارب 96 کروڑ روپے لگایا گیا۔رواں ماہ اس خریداری کے معاہدے پر دستخط کی تقریب ہوئی، اس موقع پر وزیرخزانہ اسحاق ڈار نے معاہدے کو تاریخی قرار دیتے ہوئے کہا تھا کہ پاکستان اسٹاک ایکسچینج اور شنگھائی کنسورشیم کے درمیان معاہدے سے معیشت پر مثبت اثرات مرتب گے۔

ان کا مزید کہنا تھا کہ پاکستانی معیشت کو عالمی سطح پر پہچان مل چکی ہے اور عالمی ادارے پاکستانی منڈیوں کی بہتری کے معترف ہیں۔