بلاول بھٹو کی انٹری کام کر گئی ،سابق رکن اسمبلی عرفان گردیزی کا پیپلز پارٹی میں شمولیت کا اعلان

شاہ محمود قریشی کے قریبی ساتھی ارشد راں ، عباس راں کا پی پی میں شمولیت کا امکان /جنوبی اور وسطی پنجاب کے عہدیداروں کی بھی ملاقات حکومت مخالف تحریک کے آئندہ کے پروگراموں سمیت تنظیمی امور بارے تبادلہ خیال کیا گیا،10مارچ کو ملتان میں جلسہ کرنے کا فیصلہ

ہفتہ 21 جنوری 2017 20:38

لاہور(اُردو پوائنٹ اخبارتازہ ترین - این این آئی۔ 21 جنوری2017ء) پاکستان پیپلزپارٹی کے چیئرمین بلاول بھٹو زرداری کی پنجاب میں انٹری کام کر گئی،(ق) لیگ کے سینئر نائب صدر و سابق رکن اسمبلی سید عرفان گردیزی نے پیپلز پارٹی میں شمولیت کا اعلان کر دیا،پی ٹی آئی کے وائس چیئرمین شاہ محمود قریشی کے قریبی ساتھی راں برادران کابھی پیپلزپارٹی میں شمولیت کا امکان ہے ۔

گزشتہ روز پیپلز پارٹی کے چیئرمین بلاول بھٹو زرداری سے سابق وزیراعظم یوسف رضا گیلانی، جنوبی پنجاب کے صدر مخدوم احمد محمود، نتاشہ دولتانہ اور شوکت بسرا نے ملاقات کی ۔ اس موقع پر (ق)لیگ پنجاب کے نائب صدر اوربہاولپور سے سابق رکن پنجاب اسمبلی عرفان گردیزی نے بلاول بھٹو کی قیادت پر اعتماد کا اظہار کرتے ہوئے پیپلز پارٹی میں شمولیت کا اعلان کیا ۔

(جاری ہے)

ذرائع کے مطابق اس ملاقات میں حکومت مخالف تحریک کے سلسلے میں 10 مارچ کو ملتان میں جلسہ کرنے کا فیصلہ بھی کیا گیا ۔ ذرائع کے حوالے سے بتایاگیا ہے کہ پیپلز پارٹی کی قیادت کی ہدایت پر مرکزی وصوبائی رہنما پارٹی سے ناراض ہونے ،پارٹی کو چھوڑ کر جانے اور دیگر اہم شخصیات کی پارٹی میں شمولیت کیلئے کوشاں ہیں ۔ اسی کے نتیجے میں پیپلز پارٹی کے وائس چیئرمین شاہ محمود قریشی کے قریبی ساتھی ارشد راں اور عباس راں کا پیپلز پارٹی میں شمولیت کا امکان ہے ۔

ذرائع کے مطابق راں برادران بلاول بھٹو زرداری کی ملتان آمد پر باقاعدہ پیپلزپارٹی میں شمولیت کا اعلان کرسکتے ہیں۔ بلاول بھٹو کا کہنا تھاکہ حکومت کے خلاف تحریک چل پڑی ہے اب یہ نتائج حاصل کرنے تک جاری رہے گی ۔انہوں نے کہا کہ مجھے جنوبی پنجاب کی محرومیوں کا احساس ہے، تخت رائیونڈ نے تمام وسائل لاہور پر لگا دیئے ہیں ،جنوبی پنجاب کے شہر شہر گائوں گائوں جائوں گا جہاں جلسے بھی ہوں گے ۔

جنوبی پنجاب کے لوگوں کو تخت رائیونڈ سے نجات دلوائیں گے۔جنوبی پنجاب کے کسان، مزدور، مظلوم عوام میرا ساتھ دیں مل کر تخت رائیونڈ کا خاتمہ کریں گے۔ بلاول بھٹو نے کہا کہ شریف برادران ایسے منصوبے بنا رہے ہیں جن سے عوام کو نہیں ان کی ذات کوفائدہ ہو رہا ہے۔علاوہ ازیںپاکستان پیپلزپارٹی کے چیئرمین بلاول بھٹو زرداری سے وسطی پنجاب کے ذمہ داران نے ملاقات کر کے حکومت مخالف تحریک کے آئندہ کے پروگراموں سمیت پارٹی کے تنظیمی امور بارے تفصیلی تبادلہ خیال کیا ۔

وسطی پنجاب کے صدر قمر زمان کائرہ، جنرل سیکرٹری ندیم افضل چن اور سیکرٹری اطلاعات مصطفی نواز کھوکھر سمیت دیگر پارٹی رہنمائوںنے پارٹی چیئرمین بلاول بھٹو زرداری سے ملاقات کر کے حکومت کیخلاف لاہور تا فیصل آباد ریلی کے انعقاد اور آئندہ کے پروگراموں کے حوالے سے تبادلہ خیال کیا ۔اس موقع پر پارٹی چیئرمین نے کامیاب ریلی اور جلسے کے انعقاد پر رہنمائوں کو شاباش دی ۔

بتایا گیا ہے کہ احتجاجی تحریک کے آئندہ کے پروگراموں کے لئے تجاویز زیر بحث آئی ہیں جن پرمشاورت کے بعد حتمی فیصلہ کیا جائے گا۔ اس موقع پر یہ بھی طے پایا کہ حکومت مخالف تحریک کو مرحلہ وار عروج پر لیجایا جائے گا جس کے لئے بلاول بھٹو نے کارکنوں کو فعال کرنے کی ہدایات بھی دیں۔ملاقات میں انٹر ویوز کے بعد مختلف عہدیداروں کے چنائو پر تبادلہ خیال کیا گیا اور فیصلہ کیا گیا کہ ان کے نوٹیفکیشن جلد جاری کر دئیے جائیں گے جبکہ رہ جانے والے ڈویژنز کے انٹر ویو بلاول بھٹوزرداری کے دورہ امریکہ سے واپسی پر منعقد کئے جائیںگے۔