منہا ج القرآن انٹرنیشنل کے صدر ڈاکٹر حسین محی الدین القادری کا ویٹی کن سٹی کا دورہ

لاہور(اُردو پوائنٹ اخبارتازہ ترین - آن لائن۔ 21 جنوری2017ء) منہاج القرآن انٹرنیشنل کے صدر ڈاکٹر حسین محی الدین القادری روم کی کیتھولک بین المذاہب کونسل کے نائب صدربشپ ڈاکٹر مارکس سولو اورسیکرٹری آئزہ بیل کی دعوت پر ویٹی کن سٹی پہنچے ۔منہاج القرآن انٹر فیتھ ریلیشنز کے ڈائریکٹر سہیل احمد رضا اور منہاج القرآن انٹرنیشنل اٹلی کے مرکزی قائدین بھی انکے ساتھ تھے۔

کونسل برائے بین المذاہب مکالمہ کے وائس پریذیڈنٹ بشپ مارکس سولواور میڈیم آئزہ بیل نے ڈاکٹر حسین محی الدین قادری کو ویٹی کن سٹی کی قدیم ترین تاریخ کے حوالے سے تفصیلی بریفننگ دی۔ ڈاکٹر حسین محی الدین القادری کو ویٹی کن سٹی کا تفصیلی وزٹ کروایا گیا ۔ڈاکٹر حسین محی الدین نے ویٹی کن سٹی کے اندرونی حصے بھی دیکھے اور سینٹ پیٹر بیزیلکہ چرچ کا دورہ بھی کیااور تاریخی نوادرات دیکھے ۔

(جاری ہے)

اس موقع پر ڈاکٹر حسین محی الدین نے عوامی تحریک کے سربراہ ڈاکٹر طاہر القادری کا انگریزی زبان میں مترجم دہشتگردی کے خلاف تاریخی فتویٰ بھی پیش کیا ۔انٹر فیتھ ریلیشنز کے ڈائریکٹر سہیل احمد رضا نے بشپ مارکس سولو کوڈاکٹر حسین محی الدین کی تصانیف کا تحفہ دیا ۔صدر منہاج القرآن سے گفتگو کرتے ہوئے ڈاکٹر مارکس سولو نے کہا کہ منہاج القرآن کے وفد کی ویٹی کن سٹی میں آمد سے اسلام اور مسیحیت کے مابین خوشگوار تعلقات کو فروغ ملے گا ۔

انہوں نے کہاکہ ڈاکٹر طاہر القادری ایسی شخصیت ہیں جنہوں نے دہشتگردی کے خاتمے کیلئے انسانیت کو فکری ،علمی اور عملی رہنمائی دی ہے۔تحریک منہاج القرآن نئی نسل کو دہشتگردی اور انتہا پسندی سے بچا کر معاشرے میں اعلیٰ انسانی اقدار سے روشناس کروا رہی ہے۔عالمی سطح پر امن اور محبت کے رویوں کو عام کرنے میں منہاج القرآن کا کردار قابل ستائش ہے۔

مسیحی رہنمائوں سے گفتگو کرتے ہوئے ڈاکٹر حسین محی الدین نے کہا کہ مذاہب کے درمیان مشترکات پر بہت زیادہ کام کرنے کی ضرورت ہے ۔مختلف مذاہب کے درمیان حائل خلیج کو ختم کرنے کیلئے کوشش کرنا ہر مذہب کے پیروکاروں کا اہم فریضہ ہیں ۔اس حوالے سے انٹر فیتھ ریلیشنز منہاج القرآن 90 ممالک میں کام کر رہی ہے۔ڈاکٹر طاہر القادری محبت اور امن کے رویوں کو پوری دنیا میںعام کرنے میں مرکزی کردار ادا کر رہے ہیں ۔