کراچی، نیٹو کے جنگی سازو سامان کی برآمدگی ،عدالت کا حتمی چالان پیش نہ کرنے پر تفتیشی افسر پر اظہار برہمی

جمعرات 19 جنوری 2017 20:24

کراچی (اُردو پوائنٹ اخبارتازہ ترین - این این آئی۔ 19 جنوری2017ء) کسٹم کورٹ نے نیٹو کے جنگی سازو سامان کی برآمدگی کے کیس کا حتمی چالان پیش نہ کرنے پر تفتیشی افسر پر اظہار برہمی کرتے ہوئے آئندہ سماعت پر حتمی چالان پیش کرنے کا حکم دیا ہے ۔ جمعرات کو کسٹم کورٹ کی عدالت میں نیٹو کے جنگی سازو سامان برآمدگی کیس کی سماعت ہوئی ۔ دوران سماعت تفتیشی افسر نے عدالت کو آگاہ کیا کہ امریکی حکام اپنے جنگی سازو سامان کی واپسی کے لیے خط بھی لکھ چکے ہیں ۔

اس سے قبل امریکی حکام سامان کی گمشدگی سے انکار کر رہے تھے ۔

(جاری ہے)

عدالت نے ایک سال سے زائد کا عرصہ گزرنے کے باوجود کیس کا حتمی چالان پیش نہ کرنے پر تفتیشی افسر کو جھاڑ پلاتے ہوئے ریمارکس دیئے کہ آئندہ سماعت پر کیس کا حتمی چالان ہر صورت میں جمع کرایا جائے ۔ بصورت دیگر تفتیشی افسر کے خلاف کارروائی عمل میں لائی جائے گی ۔ بعد ازاں عدالت نے کیس کی مزید کارروائی 18 فروری تک ملتوی کر دی ۔ واضح رہے کہ گذشتہ سال نیٹو کے زیر استعمال جنگی سازو سامان جنریٹرز اور دیگر اشیا برآمد ہوئی تھیں ۔ عدالت کے حکم پر کسٹم حکام نے نجی کمپنی کے دو گوداموں پر بھی چھاپہ مارا تھا جبکہ کراچی سے افغانستان جانے والے 458 کنٹینرز سے بڑی تعداد میں نیٹو کا سامان برآمد ہوا تھا ۔