تاجر برادری وطن عزیز کی معیشت کے استحکام ‘ ملکی تعمیر وترقی کیلئے کوشاں ہے ‘ ملاوٹ مافیا کے خلاف مہم میں تاجر برادری کے شانہ بشانہ چلیں گے ، پنجاب فوڈ اتھارٹی فیصل آباد کو کسی کے ساتھ ناانصافی اور بے جا کارروائیوں کی ہرگز اجازت نہیں دی جائے گی

صوبائی وزیر قانون رانا ثناء اللہ خاں کااہم اجلاس سے خطاب

جمعرات 19 جنوری 2017 19:57

فیصل آباد (اُردو پوائنٹ اخبارتازہ ترین - آئی این پی۔ 19 جنوری2017ء) صوبائی وزیر قانون رانا ثناء اللہ خاں نے کہاہے کہ تاجر برادری وطن عزیز کی معیشت کے استحکام ‘ ملکی تعمیر وترقی کیلئے کوشاں ہے ‘ ملاوٹ مافیا کے خلاف مہم میں تاجر برادری کے شانہ بشانہ چلیں گے اور پنجاب فوڈ اتھارٹی فیصل آباد کو کسی کے ساتھ ناانصافی اور بے جا کارروائیوں کی ہرگز اجازت نہیں دی جائے گی ۔

(جاری ہے)

وہ جمعرات کو پنجاب فوڈ اتھارٹی کے دفتر سرگودھا روڈ میں منعقدہ ایک اہم میٹنگ سے خطاب کررہے تھے جس میں ڈائریکٹر جنرل پنجاب فوڈ اتھارٹی نور الامین مینگل ‘ ممبران پنجاب اسمبلی حاجی خالد سعید ‘ حاجی محمد الیاس انصاری ‘ محمد نواز ملک ‘ شیخ اعجاز احمد ایڈووکیٹ ‘ وائس چیئرمین واسا میاں عرفان منان ‘ سرپرست سپریم انجمن تاجران حاجی محمد اسلم بھلی ‘ صدر جاوید ظفر ‘ جنرل سیکرٹری عباس حیدر شیخ ‘ ڈپٹی میئر محمد امین بٹ ‘ صدر فیصل آباد فوڈ بورڈ محمد نعیم ‘ وسیم ذبیح اللہ ‘ حاجی عطاء محمد ‘ صدر انجمن آرھتیاں غلہ منڈی حاجی محمد آصف اسلم ‘ جنرل سیکرٹری رانا محمد ایوب اسلم منج ‘ ڈپٹی ڈائریکٹر پنجاب فوڈ اتھارٹی فیصل آباد شہباز سرور ودیگر تاجر رہنما بھی موجود تھے ‘ اس موقع پر تاجر رہنمائوں نے اتھارٹی کی بلا جواز کارروائیوں کے خلاف شکایات کے انبار لگا دئیے اور کہاکہ تاجر برادری کسی طرح بھی ملاوٹ مافیا کے حق میں نہیں ‘ ایسے عناصر کو سزائے موت ہونی چاہئے مگر ملاوٹ اور معیار میں فرق کو دیکھے بغیر کارروائیوں کے ذریعہ دکانداروں ‘ ہوٹل ‘ ریسٹورنٹ مالکان کو ہراساں کیا جارہا ہے ‘ نیز بھاری جرمانوں کے ساتھ ساتھ فیکٹریاں ‘ کارخانے ‘ گودام ‘ ہوٹلز وغیرہ سیل کئے جارہے ہیں جس پر رانا ثناء اللہ خاں نے ڈپٹی ڈائریکٹر فوڈ اتھارٹی فیصل آباد شہباز سرور ودیگر عملہ کے اس اقدام کو غیر مستحسن قرار دیتے ہوئے واضح کیا کہ اصل ملاوٹ مافیا کے خلاف کارروائیوں کے ضمن میں تاجر برادری سے مشاورتی عمل جاری رکھا جائے ‘ نیز انہوں نے ایک کمیٹی بھی تشکیل دی ہے جو چند روز تک درپیش تحفظات کے ازالہ کیلئے ڈی جی نور الامین مینگل کو سفارشات اور تجاویز پیش کرے گی ‘ ڈائریکٹر جنرل پنجاب فوڈ اتھارٹی نور الامین مینگل نے واضح کیا ہے کہ حکومت پنجاب کی ہدایات کی روشنی میں تاجروں کو درپیش تحفظات کا بھر پور ازالہ کیا جائے گا اور اُن کی حق تلفی نہیں ہونے دی جائے گی ۔