پولیس پھر عدالتوں کے احکامات کو ہوا میں اڑانے لگی

لاہور ہائی کورٹ کا ایڈیشنل آئی جی اشٹیبلشمنٹ کے خلاف توہین عدالت کی دائر درخواست پر نوٹس جاری ، یکم فروری کو طلب

منگل 17 جنوری 2017 22:48

لاہور(اُردو پوائنٹ اخبارتازہ ترین - آن لائن۔ 17 جنوری2017ء) پولیس پھر عدالتوں کے احکامات کو ہوا میں اڑانے لگی اس کے برعکس پنجاب حکومت کی جی حضوری ’’ کیا حکم ہے میرے آقا‘‘ میں مصروف ہوگئی لاہور ہائی کورٹ کے جسٹس محمد علی نے ایڈیشنل آئی جی اشٹیبلشمنٹ اظہر حمید کھوکھر کے خلاف توہین عدالت کی دائر درخواست پر نوٹس جاری کرتے ہوئے انہیں یکم فروری کو ا پنی عدالت طلب کر لیا ہے ۔

لاہور ہائی کورٹ کے روبرو عاشق حسین سمیت 7پولیس اے ایس آئیز نے صفدر کسر ایڈووکیٹ کی وساطت سے ایڈیشنل آئی کے خلاف توہین عدالت کی درخواست دائر کی ۔

(جاری ہے)

گذشتہ روز دوران کیس کی سماعت میں درخواست گذاروں کے کونسل صفدر کسر ایڈووکیٹ نے عدالت کو اپنے دلائل میں کہاکہ معاشرے کا پسا ہوا طبقہ جن کے مسائل محکمہ جات سے حل نہیں ہوتے وہ وکلاء کے پاس آتے ہیں اور عدالتوں سے داد رسی کے لیے رجوع کرتے ہیں اور وکلاء وہ کیس عدالتوں میں پیش کرتے ہیںمعزز عدالتیں احکامات جاری کرتی ہیں وزیر اعلیٰ کے احکامات کو تو سر آنکھوں پر رکھا جاتا ہے اور پولیس اعلیٰ حکام وزیر اعلیٰ کا حکم وصول کرنے کے لیے رائیونڈ فارم ہائوس پہنچتے ہیں اور کہتے ہیں کہ کیا حکم ہے میرے آقا لیکن معزز عدالتوں کے احکامات کو پھاڑ کر ردی کی ٹوکری کی نظر کر دیئے جاتے ہیں انہوں نے عدالت کو یہ بھی بتایا کہ 9دسمبر 2016کو فاضل عدالت نے ایڈیشنل آئی جی پولیس کو حکم دیا تھا کہ وہ درخواست گذاروں کی درخواستوں پر 10دن میں فیصلہ کر کے رپورٹ عدالت میں پیش کریں لیکن تقریباًدوماہ ہو گئے لیکن کوئی فیصلہ کیا گیا اور نہ ہی رپورٹ عدالت میں پیش کی گئی لہذا عدالت اس امر کا نوٹس لے فاضل عدالت نے نوٹس جاری کرتے ہوئے ایڈیشنل آئی جی پنجاب پولیس کو یکم فروری کو اپنی عدالت طلب کر لیا ہے ۔

(بخت گیر)