فریقین پاناما لیکس مقدمے میں تحمل کا مظاہرہ کریں، فریقین کو انتظار کرناچاہئے فیصلے سے حقائق سامنے آجائینگے ،سید غوث علی شاہ

سعید الزماں صدیقی کو خراج عقیدت پیش کرنے کیلئے گورنر ہائوس کے قریب ہی واقع کسی ایک شاہراہ کا نام ان سے منسوب کیا جائے، میڈیا سے گفتگو

جمعہ 13 جنوری 2017 23:34

کراچی (اُردو پوائنٹ اخبارتازہ ترین - این این آئی۔ 13 جنوری2017ء) مسلم لیگ (ن) کے سینئر رہنما سابق وزیر اعلی سندھ سید غوث علی شاہ نے کہا ہے کہ پاناما لیکس کیس میں تحمل کا مظاہرہ کرنا چاہئے۔

(جاری ہے)

سپریم کورٹ کا 5 رکنی بینچ مقدمے کی سماعت روزانہ کی بنیار پر کررہا ہے ،اس لئے تمام فریقین کو فیصلہ کا انتظار کرنا چاہئیے جو بھی فیصلہ آئے گا اس سے حقائق سامنے آجائیں گے ،وہ جمعہ کو گورنر ہاس میں سابق گورنر (ر)جسٹس سعید الزماں صدیقی کی نماز جنازہ کے بعد میڈیا سے گفتگو کررہے تھے،ایک سوال پر سید غوث علی شاہ نے کہا کہ عدالت سب کا موقف سننے کے بعد فیصلہ دے گی،اس لئے جلد بازی نہیں کرنا چاہئیے،انہوں نے مرحوم سعید الزماں صدیقی کی خدمات کو زبردست خراج تحسین پیش کرتے ہوئے کہا کہ وہ ملکی اثاثہ تھے اور ان کی بڑی خوبی یہ تھی کہ سعید الزماں صدیقی پاکستان کی خالق جماعت مسلم لیگ کے حامی تھے اور یہ سمجھتے تھے کہ یہی جماعت پاکستان کے مسائل حل کرسکتی ہے،سید غوث علی شاہ نے کہا کہ سعید الزاماں صدیقی نے ہائی کورٹ اور سپریم کورٹ کے بہت سے اہم مقدمات کی فیصلے سنائے جو آج بھی پی ایل ڈی میں موجود ہیں،انہوں نے کہا کہ مرحوم کے انتقام پر میں یہی کہونگا کہ میرا ایک بھائی مجھ سے بچھڑ گیا ہے ،انہوں نے کہا کہ سعید الزماں صدیقی کو خراج عقیدت پیش کرنے کا یہی طریقہ ہے کہ گورنر ہاس کے قریب ہی واقع کسی ایک شاہراہ کا نام سعید الزماں صدیقی کے نام سے منسوب کردیا جائے،بھاری اشتعال انگیز ی پر غصے کا اظہار کرتے ہوئے سید غوث علی شاہ نے کہا کہ بھارتی نئے آرمی چیف پاکستان کو دھمکیاں نہ دیں اور یاد رکھیں کہ پاکستان ایک ایٹمی قوت ہے ،جس کی فوج اور عوام ملک کی حفاظت کرنا جانتے ہیں،انہوں نے کہا کہ بھارتی ظالم فوج کا نہتے شہریوں پر گولے برسانا بدترین بزدلی ہے ،اقوام متحدہ اور انسانی حقوق کی تنظیموں کو اس کا نوٹس لینا چاہئے ،انہوں نے کہا کہ پاکستان ایک آزاد اور خود مختار ملک ہے جس کے خلاف دشمن کے عزائم کبھی کامیاب نہیں ہوں گے۔