آزادانہ تجارت کے معاہدہ سے متعلق مذاکرات کیلئے ترکی اور تھائی لینڈ کے وفود 17 جنوری کو پاکستان آئیں گے

تین ماہ کے دوران دستخط ہونے کے امکانات ہیں، چین کے ساتھ بھی آزادانہ تجارت کے معاہدہ پر بات چیت ہو رہی ہے، وزارت تجارت

جمعرات 12 جنوری 2017 19:35

اسلام آباد ۔ (اُردو پوائنٹ اخبارتازہ ترین - اے پی پی۔ 12 جنوری2017ء) ترکی اور تھائی لینڈ کے اعلیٰ سطحی وفود آزادانہ تجارت کے معاہدہ (ایف ٹی ای) سے متعلق مذاکرات کیلئے 17 جنوری کو پاکستان آئیں گے، دونوں ممالک کے ساتھ آزادانہ تجارت کے معاہدہ (ایف ٹی ای) پر آئندہ تین ماہ کے دوران دستخط ہونے کے امکانات ہیں۔ وزارت تجارت کے ذرائع کے مطابق ترکی اور تھائی لینڈ کے حکام ایف ٹی اے پر کام کی رفتار تیز کرنے اور اس سے متعلقہ امور پر مذاکرات کیلئے پاکستان کا دورہ کریں گے۔

انہوں نے کہا کہ حکومت تجارتی سرگرمیوں کے فروغ اور پاکستانی مصنوعات کو عالمی سطح پر رسائی دینے کیلئے پرعزم ہے اور اس حوالہ سے چین کے ساتھ بھی آزادانہ تجارت کے معاہدہ پر بات چیت ہو رہی ہے۔ انہوں نے بتایا کہ دونوں ممالک کے ساتھ ایف ٹی اے سے نہ صرف دونوں ممالک کے ساتھ تجارتی سرگرمیوں میں اضافہ ہو گا بلکہ برآمدات میں بھی تیزی آئے گی۔

(جاری ہے)

انہوں نے بتایا کہ اس حوالہ سے برآمد کنندگان، چیمبرز آف کامرس اور تمام شراکت داروں سے مشاورتی عمل کو فروغ دیا جا رہا ہے تاکہ ان ممالک کے ساتھ آزادانہ تجارت کے معاہدہ سے متعلق تجاویز حاصل کی جا سکیں۔ ایک سوال کے جواب میں انہوں نے بتایا کہ حکومت برآمد کنندگان کو مسابقتی عمل میں شامل کرنے کیلئے یکساں مواقع فراہم کر رہی ہے۔