وزیراعظم محمد نواز شریف نے 340میگاواٹ کے چشمہ تھری جوہری بجلی گھر کا افتتاح کردیا

چائنا نیشنل نیوکلیئرکارپوریشن اور پاکستان اٹامک انرجی کمیشن کے تعاون سے مکمل کئے گئے منصوبے سے بجلی کی قلت پر قابو پانے میں مدد ملے گی، چشمہ فور نیو کلیئر پاور منصوبہ 2017 ء میں مکمل ہو گا

بدھ 28 دسمبر 2016 11:52

وزیراعظم محمد نواز شریف نے  340میگاواٹ کے چشمہ تھری جوہری بجلی گھر کا ..
چشمہ ۔ (اُردو پوائنٹ اخبارتازہ ترین - اے پی پی۔ 28 دسمبر2016ء) وزیراعظم محمد نواز شریف نے بدھ کو 340میگاواٹ کے چشمہ تھری جوہری بجلی گھر کا افتتاح کردیا۔وفاقی وزیرپانی وبجلی خواجہ محمد آصف، وزیر مملکت برائے پانی و بجلی عابد شیر علی ، وزیراعظم کے مشیر برائے خارجہ امور سرتاج عزیزاور پاکستان اٹامک انرجی کمیشن کے چیئرمین محمد نعیم بھی اس موقع پر موجود تھے۔

قبل ازیں کنٹرول روم میں وزیراعظم کو پلانٹ منیجر ریاض خالق انصاری نے بریفنگ دی، وزیراعظم کو بتایا گیا کہ یہ منصوبہ چائنا نیشنل نیوکلیئرکارپوریشن اور پاکستان اٹامک انرجی کمیشن کے مشترکہ تعاون سے مکمل کیاگیا ہے جوملک میں بجلی کی قلت پر قابوپانے میں مدد دے گا۔ چشمہ ون اور چشمہ ٹو پراجیکٹ کے کامیاب آپریشن کے بعد یہ تیسرا منصوبہ ہے۔

(جاری ہے)

چشمہ فور نیو کلیئر پاور کا منصوبہ 2017 میں مکمل ہو گا جبکہ کراچی نیوکلیئر پاور پراجیکٹ کے۔2 اور کے ۔3 سے 2030تک قومی گرڈ میں 8800میگا واٹ بجلی کا اضافہ ہوگا جو پاکستان اٹامک انرجی کمیشن کیلئے وسط مدتی ہدف ہے۔پاکستان نیو کلیئر ریگولیٹری اتھارٹی نے چشمہ تھری سمیت تمام نیو کلیئر پاور منصوبوں کی منظوری دی ہے جو انٹرنیشنل اٹامک انرجی ایجنسی معاہدوں کے جوہری معیارات کے عین مطابق ہیں۔

چشمہ تھری پاور پلانٹ پاک چین مشترکہ تعاون کا ایک اور اہم سنگ میل ہے۔ اس سے صنعتی اورتجارتی شعبوں کو توانائی کی فراہمی کیلئے ذریعہ ملک کی مجموعی اقتصادی ترقی میں مدد ملے گی۔وزیراعظم محمد نواز شریف نے تختی کی نقاب کشائی کرکے منصوبے کا باقاعدہ افتتاح کیا۔ اس موقع پر ملک کی سلامتی ، ترقی اورخوشحالی کیلئے دعا بھی کی گئی۔