لیاقت بلوچ نے سینئر سیاستدان جاوید ہا شمی کو جماعت اسلامی میں شمولیت کی دعوت دیدی ،لیگی کارکنوں کے ویلکم ویلکم کے نعرے

لاہور (اُردو پوائنٹ اخبارتازہ ترین - این این آئی۔ 26 دسمبر2016ء) جماعت اسلامی کے سیکرٹری جنرل سیکرٹری لیاقت بلوچ نے سینئر سیاستدان جاوید ہا شمی کو جماعت اسلامی میں شمولیت کی دعوت دیدی جبکہ جا وید ہا شمی نے کہا کہ میں پی ٹی آئی میں شمولیت کے وقت بھی اپنے گھر میں صاف کہہ کر آیا تھا کہ میں مروں تو مجھے مسلم لیگ کے جھنڈے میں دفن کرنا۔ الحمر امیں خواجہ رفیق شہید کی برسی کے سلسلے میں منعقدہ سیمینار کے موقع پر خطاب کرتے ہوئے جماعت اسلامی کے سیکرٹری جنرل لیاقت بلوچ نے کہا کہ جا وید ہا شمی صاحب ! آ پ ایک مرتبہ پھر اپنے پرانے تالاب میں واپس جانے کی تیا ری کر رہے ہیں لیکن آپ جس جماعت میں بھی گئے آپ کو قربانیوں کا صلہ نہیں ملا ، میں آپ کواعلانیہ طورپراتنے سیاستدانوں کی مو جو دگی میں جماعت اسلامی میں شمولیت کی دعوت دیتا ہوں ، آپ اگر مولانا مو دودی کی فکر اور فلسفے کے ساتھ منسلک ہوجائیں تو عزت بھی ملے گی ، مقام بھی ملے گا اور سب کچھ ملے گا ۔

(جاری ہے)

سیمینار سے خطاب کے دوران جاوید ہا شمی نے لیاقت بلوچ کی پیشکش کا جواب دیتے ہوئے کہا کہ میرے بارے میں پا رٹی وابستگی کے حوالے سے مختلف زمانوں میں مختلف قیاس آرائیاں زبان زد عام رہی ہیں ، ایسی باتیں ہو تی رہتی ہیں، اگر چہ میں مسلم لیگ سے روٹھ کر پی ٹی آئی میں آیا تھا لیکن میں پی ٹی آئی میں شمولیت کے وقت بھی اپنے گھر میں صاف کہہ کر آیا تھا کہ میں مروں تو مجھے مسلم لیگ کے جھنڈے میں دفن کرنا۔ سیمینار میں شرکت کے لئے آنے والے (ن) لیگ کے کارکن بھی ویلکم ویلکم ہاشمی ویلکم کے نعرے لگاتے رہے ۔