ملک میں توانائی کی پیداوار میں سالانہ بنیادوں پر4.6فیصد اضافہ ریکارڈ

توانائی کی پیداوار میں ہائیڈل ،گیس اور فرنس آئل کا حصہ زیادہ رہا ہے، نیپرا

پیر 26 دسمبر 2016 17:51

کراچی (اُردو پوائنٹ اخبارتازہ ترین - آن لائن۔ 26 دسمبر2016ء) ملک میں توانائی کی پیداوار میں سالانہ بنیادوں پر4.6فیصد اضافہ ریکارڈ کیا گیا ہے، نومبر2016ء میں توانائی کی پید اوار6840گیگا واٹ آوررہی جبکہ گذشتہ سال نومبر2015ء میں پیداواری توانائی 6540گیگا واٹ آور تک محدود تھی ۔نیپرا ذرائع کے مطابق توانائی کی پیداوار میں ہائیڈل ،گیس اور فرنس آئل کا حصہ زیادہ رہا ہے ۔

(جاری ہے)

ہائیڈل اور گیس (بشمول آر ایل این جی) سے سالانہ پیداواری توانائی بالترتیب 23.5فیصد اضافے سے 2843گیگا واٹ آور اور1.1فیصد اضافے سی2122گیگا واٹ آور ریکارڈ کی گئی ہے تاہم فرنس آئل سے تیار کی جانیوالی بجلی میں سالانہ بنیادو ں پر 27.5فیصدکمی واقع ہوئی ہے اور ماہ نومبر2016ء میں فرنس آئل کے ذریعے توانائی پیداوار1345واٹ آور تک محدود رہی جس کی بنیادی وجہ ہائیڈل اور کوئلے کی نسبت فرنس آئل سے تیار کی جانیوائی توانائی کی لاگت زیادہ بتائی جاتی ہے ۔مزید برآں سال بسال بنیادوں پر ملک میںنیوکلئیر بیس توانائی کی پیداوار 54.4فیصد اضافے سے 338گیگا واٹ آور تک جا پہنچی ہے ۔ #