کرسمس کی تقریبات کے سلسلے میں مسیحی نوجوانوں میں گائیکی کا مقابلہ 27 دسمبر کوہوگا

جمعہ 23 دسمبر 2016 22:40

فیصل آباد۔23 دسمبر(اُردو پوائنٹ اخبارتازہ ترین - اے پی پی۔ 23 دسمبر2016ء) ضلعی انتظامیہ اور فیصل آباد آرٹس کونسل کے اشتراک سے کرسمس کی تقریبات کے سلسلے میں مسیحی نوجوانوں میں مقابلہ گائیکی 27 دسمبر کو نصرت فتح علی خاں آڈیٹوریم میں منعقد ہوگا جس میں پہلی تین پوزیشن حاصل کرنے والے گلوکاروں کو پرکشش نقد انعامات دئیے جائیں گے۔اس امر کا اعلان ڈی سی او سلمان غنی نے مسیحی برادری کے نمائندوں سے ملاقات کے دوران کیا۔

(جاری ہے)

انہوں نے ریذیڈنٹ ڈائریکٹر آرٹس کونسل طارق جاوید کو ہدایت کی کہ وہ مقابلہ گائیکی کیلئے ضروری انتظامات کو فوری طور پر حتمی شکل دیں۔اس مقابلے میں 30 سال تک کی عمر کے مرد و خواتین حصہ لے سکیں گے جس کیلئے آڈیشن 26 دسمبر کی دوپہر بارہ بجے پریسبیٹیرین چرچ ریلوے روڈ نزد گمٹی چوک میں ہوں گے اور آڈیشن میں منتخب ہونے والے گلوکار 27 دسمبر چار بجے تک اپنے نام فیصل آباد آرٹس کونسل میں درج کراسکیں گے۔