الخدمت فائونڈیشن بلوچستان نگران کمیٹی کااہم اجلاس

کوئٹہ (اُردو پوائنٹ اخبارتازہ ترین - این این آئی۔ 18 دسمبر2016ء) الخدمت فائونڈیشن بلوچستان نگران کمیٹی کااہم اجلاس صوبائی صدر میر محمد عاصم سنجرانی کی صدارت میں الخدمت فائونڈیشن کے صوبائی سیکرٹریٹ کوئٹہ میں منعقدہوااجلاس میں جماعت اسلامی کے صوبائی امیر مولانا عبدالحق ہاشمی نے خصوصی طور پر شرکت کی جبکہ جماعت اسلامی کے صوبائی جنرل سیکرٹری ہدایت الرحمان بلوچ،الخدمت فائونڈیشن کے صوبائی نائب صدر عبدالواحدناصر بھی شریک رہے اس موقع پر الخدمت فائونڈیشن کی اب تک کی کارکردگی کاجائزہ لیاگیا اور مستقبل کے حوالے سے مختلف اہم فیصلے ومشاورت بھی کی گئی ۔

الخدمت فائونڈیشن کے صوبائی صدر میر محمد عاصم سنجرانی نے جماعت اسلامی کے صوبائی امیر مولاناعبدالحق ہاشمی کو کارکردگی مسائل ومنصوبہ کے حوالے سے بریفنگ دیتے ہوئے کہا کہ غربت بے روزگاری اورمہنگائی نے بلوچستان میں کم آمدنی والے خاندانوں کی مشکلات اور پریشانیوں میں اضافہ کر دیا ہے دکھی انسانیت کی خدمت سے روحانی سکون کیساتھ دنیا وآخرت کی کامیابیاں نصیب ہوتی ہیں الخدمت فائونڈیشن بلاتفریق رنگ ونسل پریشان حال لوگوں کی خدمت کر رہی ہے ۔

(جاری ہے)

صوبے میں تعلیم وصحت اورروزگار کے کم ذرائع کی وجہ سے الخدمت فائونڈیشن کے کام بڑھ گیے ہیں ہم انشاء اللہ کم آمدنی والے خاندانوں یتیموں بیوائوں اور بے سہاراافرادکی کفالت کے پراجیکٹس کومزید وسعت اور ترقی دیں گے مخیر حضرات تاجر برادری سماجی سیاسی تنظیمیں الخدمت فائونڈیشن کی دکھی انسانیت کی خدمت میں ساتھ دیں۔اس موقع پر جماعت اسلامی کے صوبائی امیر مولاناعبدالحق ہاشمی نے کہا کہ عوام الناس فلاحی سماجی تنظیمیں اور حکومت ہمارے ساتھ تعاون کریں ۔

ایمبولینس سروس،ڈائگنوسٹک سینٹر اور الخدمت ایمانا ہسپتال سے لاکھوں غریب لوگ مستفیدہورہے ہیں انہی پراجیکٹس کی وسعت وترقی کیلئے ہم جدوجہد کر رہے ہیں ہمیں فخر ہے کہ الخدمت فائونڈیشن نے بلوچستان میں بھی اجتماعی کاموں کے مختلف پراجیکٹس پر کام شروع کیا ہے انشاء اللہ وقت اوروسائل کی فراہمی کیساتھ ساتھ ہم اس میں وسعت وترقی لے آئیں گے الخدمت فائونڈیشن ملک بھر کی طرح بلوچستان میں بھی غربت کے خاتمے اور غریبوں کی مشکلات کم کرنے کے حوالے سے مختلف پراجیکٹس پر کام کر رہی ہے ۔منتخب نمائندوں کو بھی عوام کی مشکلات وپریشانیوں کودیکھتے ہوئے غریبوں کی مدد کے حوالے سے کام کرنا چاہیے ۔