فلم ہیری پوٹر میں دکھائی جانے والی ٹوپی جیسی مکڑی دریافت

اس مکڑی کا نام ٹوپی کے مالک گوڈرک گریفنڈر کے نام پر رکھ دیا گیاہے‘ماہرین

اتوار 18 دسمبر 2016 11:30

ممبئی(اُردو پوائنٹ اخبارتازہ ترین - این این آئی۔ 18 دسمبر2016ء) بھارتی سائنسدانوں نے مکڑی کی ایک نئی قسم دریافت کی ہے جو حیرت انگیز طور پر ہالی ووڈ فلم سیریز ہیری پوٹر میں دکھائی جانے والی ٹوپی کی شکل جیسی ہے۔ ماہرین نے اس مکڑی کا نام ٹوپی کے مالک گوڈرک گریفنڈر کے نام پر رکھ دیا ہے۔اس مکڑی کی دریافت جنوب مغربی بھارت کے پہاڑوں میں کیے جانے والے ایک سروے کے دوران ہوئی۔

سروے میں شامل سائنس دان جاوید احمد نے بتایا کہ جب انہوں نے اس مکڑی کو دیکھا تو ان سمیت تمام لوگ حیرت سے چیخ اٹھے، ’ارے یہ تو بالکل ہیری پوٹر کی ٹوپی جیسی مکڑی ہے۔انہوں نے کہا کہ یہ حیرت انگیز طور پر اس سے بے حد مشابہہ تھی۔جاوید اور ان کی ٹیم نے فیصلہ کیا تھا کہ مکڑی پر تحقیق کے بعد اگر یہ کوئی نئی قسم کی مکڑی ثابت ہوگئی تو وہ اس کا نام فلم میں دکھائے جانے والے ٹوپی کے مالک کے نام پر ہی رکھیں گے۔

(جاری ہے)

تحقیقی مقالے کی اشاعت کے بعد جاوید احمد نے ہیری پوٹر کی مصنفہ جے کے رولنگ کو بھی ٹوئٹر پر اس بات سے مطلع کیا۔ جے کے رولنگ نے اس پر نہایت خوشی کا اظہار کرتے ہوئے جاوید اور ان کی ٹیم کو مبارک باد دی۔واضح رہے کہ فلم ہیری پوٹر سیریز ایک تخیلاتی جادوئی اسکول کی کہانی ہے جو بچوں اور بڑوں میں یکساں مقبول ہے۔ سیریز کا ایک اور حصہ ’فنٹاسٹک بیسٹس اینڈ ویئر ٹو فائنڈ دیم‘ حال ہی میں ریلیز کیا گیا ہے جو اس سیریز کا پریکوئل ہے۔

متعلقہ عنوان :