افغانستان ، ایئر پورٹ پر نامعلوم مسلح افراد کی فائرنگ ، 5 خواتین سکیورٹی اہلکار ہلاک

خواتین سکیورٹی اہلکار اپنی ڈیوٹی پر ایئر پورٹ آرہی تھیں کہ موٹر سائیکل پر سوار دو نامعلوم مسلح افراد نے انکی وین پر حملہ کیا،خواتین سکیورٹی اہلکار قندھار کے ایئرپورٹ مسافر خواتین کی تلاشی پر مامور تھیں،ترجمان صوبائی گورنر

ہفتہ 17 دسمبر 2016 14:36

کابل(اُردو پوائنٹ اخبارتازہ ترین - آئی این پی۔ 17 دسمبر2016ء) افغانستان کے جنوبی صوبہ قندھار کے ایئر پورٹ پر نامعلوم مسلح افراد نے فائرنگ کر کے 5 خواتین سکیورٹی اہلکاروں کو ہلاک کر دیا ۔ہفتہ افغان میڈیا کے مطابق صوبائی گورنر کے ترجمان سمیم اخلواک نے بتایا ہے کہ واقعہ صبح کے وقت پیش آیا جب خواتین سکیورٹی اہلکار اپنی ڈیوٹی پر ایئر پورٹ آرہی تھیں کہ موٹر سائیکل پر سوار دو نامعلوم مسلح افراد نے اس وین پر حملہ کیا۔

ترجمان سمیم اخلواک نے بتایا کہ اس حملے میں پانچ خواتین اور ان کے ڈرائیور ہلاک ہو گئے ہیں۔خواتین سکیورٹی اہلکار قندھار کے ایئرپورٹ مسافر خواتین کی تلاشی پر مامور تھیں۔یاد رہے کہ ماضی میں بھی قندھار میں طالبان نے کئی حملے کیے ہیں۔قندھار ایئر پورٹ کے ڈائریکٹر احمد اللہ فیضی نے بتایا کہ خواتین کو اس نوعیت کی ملازمت میں تسلیم نہیں کیا جا رہا تھا اور انھیں دھمکیاں بھی مل رہیں تھیں، جس پر وہ پریشان تھیں۔

(جاری ہے)

کسی گروہ نے بھی تاحال اس حملے کی ذمہ داری قبول نہیں کی ہے لیکن افغانستان میں کئی بار طالبان نے خو اتین کو نشانہ بنایا ہے۔ایئر پورٹ کے ڈائریکٹر مسٹر فیضی نے بتایا کہ حملے کے بارے میں تحقیقات جاری ہیں لیکن ابھی تک اس میں گرفتاری نہیں ہوئی ہے ۔افغانستان کے اٹارنی جنرل کے دفتر کا کہنا ہے کہ سنہ 2016 کے پہلے آٹھ ماہ کے دوران خواتین کے خلاف جرائم سے متعلق 3700 مقدمات درج ہوئے اور سنہ 2015 میں اس نوعیت کے مقدمات کی تعداد پانچ ہزار سے زائد ہے۔