کراچی ،لیاقت علی خان چوک کے قریب ہنگامہ آرائی اور پولیس کے ساتھ تصادم

ایم کیو ایم لندن کے کارکنان کے خلاف عزیز آباد تھانے میں مقدمہ درج

ہفتہ 10 دسمبر 2016 19:22

کراچی (اُردو پوائنٹ اخبارتازہ ترین - آن لائن۔ 10 دسمبر2016ء) کراچی کے علاقے عزیز آباد میں لیاقت علی خان چوک (مکا چوک) کے قریب ہنگامہ آرائی اور پولیس کے ساتھ تصادم میں ملوث متحدہ قومی موومنٹ (ایم کیو ایم) لندن کے کارکنان کے خلاف عزیز آباد تھانے میں مقدمہ درج کرلیا گیا۔

(جاری ہے)

یاد رہے کہ گذشتہ روز لیاقت علی خان چوک اور نائن زیرو کے اطراف موجود یوم شہداء منانے والے ایم کیو ایم لندن کے کارکنان کی جانب سے ’ یادگار شہداء ' پر حاضری کی کوشش کی گئی تھی، جسے پولیس کی جانب سے روکا گیا تھا۔

روکے جانے پر ایم کیو ایم لندن کے کارکنوں نے پولیس پر پتھراؤ کیا تھا، جس پر پولیس نے لاٹھی چارج کرتے ہوئے کئی افراد کو حراست میں لے لیا تھا۔لیاقت علی خان چوک پر ایم کیو ایم کا جھنڈا لہرانے اور پولیس پر پتھراؤ میں ملوث ان کارکنان کے خلاف عزیز آباد تھانے میں مقدمہ درج کرلیا گیا ہے جس میں ہنگامہ آرائی اور نقصِ امن کی دفعات شامل کی گئی ہیں۔عزیزآباد تھانے میں درج کیے جانے والے مقدمے میں 15 سے زائد افراد کو نامزد کیا گیا ہے۔