طیارہ حادثے کی تحقیقاتی ٹیم نے باضابطہ تحقیقات کا آغاز کردیا

حکام کو جائے حادثہ سے طیارے کا ملبہ اٹھانے سے بھی روک دیاگیا حادثے کا شکار ہونے والے طیارے کے بلیک باکس کو ڈی کوڈ کرنے کیلئے کراچی پہنچا دیا گیا

جمعہ 9 دسمبر 2016 23:20

اسلام آباد(اُردو پوائنٹ اخبارتازہ ترین - این این آئی۔ 09 دسمبر2016ء) طیارہ حادثے کی تحقیقاتی ٹیم نے باضابطہ تحقیقات کا آغاز کردیا ہے ،ْ حکام کو جائے حادثہ سے طیارے کا ملبہ اٹھانے سے بھی روک دیاگیا نجی ٹی وی کے مطابق طیارہ حادثے کی وجوہات جاننے کیلئے قائم کی گئی تحقیقاتی ٹیم نے باضابطہ طور پر تحقیقات کا آغاز کردیا ہے اور اس سلسلے میں سیفٹی انویسٹی گیشن بورڈ کی 6 رکنی ٹیم نے جائے حادثہ کا دورہ کیا، ٹیم نے جائے حادثہ سے مزید شواہد اکٹھا کرلیے ،ْ حکام کو تحقیقات مکمل ہونے تک طیارے کا ملبہ اٹھانے سے روک دیا ہے۔

دوسری جانب حادثے کا شکار ہونے والے طیارے کے بلیک باکس کو ڈی کوڈ کرنے کیلئے کراچی پہنچا دیا گیا ہے جہاں بلیک باکس کو ڈی کوڈ کرنے کیلئے فرانسیسی ٹیم کی آمد کا انتظار کیا جارہا ہے۔

(جاری ہے)

ذرائع کے مطابق فرانسیسی ٹیم کی آئندہ 48 گھنٹوں میں کراچی آمد متوقع ہے ،ْٹیم کی معاونت کے لیے پاکستانی ماہرین بھی موجود ہیں۔ ذرائع نے بتایا کہ اگر فرانس کی ٹیم بلیک باکس کو ڈی کوڈ کرنے کے لیے کراچی پہنچتی ہے تو پی آئی اے کے پاس ڈی کوڈ کرنے کے انتظامات موجود ہیں ۔واضح رہے کہ گزشتہ روز پی آئی اے کا چترال سے اسلام آباد جانے والا طیارہ حویلیاں کے قریب گرکر تباہ ہوا جس میں جہاز کے عملے سے 47 افراد جاں بحق ہوئے ،ْ طیارے میں معروف نعت خواں جنید جمشید بھی اپنی اہلیہ کے ہمراہ سوار تھے۔