طیارہ حادثہ، ایم ڈی پی آئی اے کو فوری طور پر برطرف کیا جائے، خورشید شاہ

جمعرات 8 دسمبر 2016 16:13

اسلام آباد(اُردو پوائنٹ اخبارتازہ ترین - آئی این پی۔ 08 دسمبر2016ء) قومی اسمبلی میں قائد حزب اختلاف سید خورشید شاہ نے کہاہے کہ کوئی بھی پائلٹ جان بوجھ کر اپنی جان خطرے میں نہیں ڈالتا اورحویلیاں طیارہ حادثے کے ذمہ دار ایم ڈی پی آئی اے ہیں، انہیں فوری طور پر برطرف کیا جائے۔

(جاری ہے)

پارلیمنٹ کے باہرسید خورشید شاہ کا میڈیا کے نمائندوں سے بات کرتے ہوئے کہنا تھا کہ کوئی بھی پائلٹ اپنی جان کو جان بوجھ کرخطرے میں نہیں ڈال سکتا، حویلیاں طیارہ حادثے کے ذمہ دار ایم ڈی پی آئی اے ہے انہیں فوری برطرف کیا جائے اورآئندہ اس طرح کے سانحات سے بچنے کیلئے حالیہ واقعے کی جنگی بنیادوں پرتحقیقات شروع کی جائیں۔

خورشید شاہ کا کہنا تھا کہ حادثے کا شکار ہونے والا طیارہ اے ٹی آرز بلند مقامات پر جانے کے لئے موزوں نہیں لیکن جو طیارہ اونچی پرواز کیلئے نہیں بنا اسے چترال بھیج دیا گیا اوریہی اے ٹی آرہرماہ لاکھوں روپے کا نقصان بھی کرتے ہیں۔ ان کا کہنا تھا کہ پیپلزپارٹی نے حکومت کو4 مطالبات پیش کئے ہیں۔ یہ چاروں مطالبات قومی نوعیت کے ہیں، حکومت جان لے ہم لاٹھیاں کھانے والے کارکن ہیں ۔اگر مطالبات تسلیم نہ ہوئے تو حکومت کیلئے بہت مشکل ہوجائے گی۔