ووٹ کے ٹرن آئوٹ میں اضافے کے لیے ووٹر فہرستوں میں اندراج ناگزیر ہے، سیف اللہ کیتھران

سبی(اُردو پوائنٹ اخبارتازہ ترین - آن لائن۔ 07 دسمبر2016ء) ڈپٹی کمشنر سبی سیف اللہ کھیتران نے کہا ہے کہ ووٹ کے ٹرن آئوٹ میں اضافے کے لیے ووٹر فہرستوں میں اندراج ناگزیر ہے،ووٹ ڈالنا قومی فریضہ ہے جس کے ذریعے نمائندوں کا انتخاب ممکن ہوتا ہے،حق رائے دہی سے روکنے والی قوت کا تدارک بھی ووٹ ہی کے ذریعے ممکن ہے،جمہوری عمل کو مستحکم بنانے کے لیے خواتین کی شرکت ضروری ہے،70کی دہائی سے لیکر2013کے انتخابات تک ووٹ ڈالنے کا ٹرن آئوٹ 38فیصد سے نہیں بڑھا ہے جو افسوسناک عمل ہے،ووٹ کی اہمیت و افادیت کو اجاگر کرنے کے لیے سول سائٹی،پروفیسرز ،میدیا اور علماء کرام اپنا کردار ادا کریں ان خیالات کا اظہار انہوں نے نیشنل ووٹر ڈئے کے موقع پر سرکٹ ہائوس میں منعقدہ سیمینار سے خطاب میں کیا،قبل ازیں ریجنل الیکشن کمشنر سبی ڈویژن سبی جاوید خان آفریدی نے ووٹ کی اہمیت و افادیت سمیت ووٹ کے اندراج سے متعلق سیمینار کے شرکاء کو تفصیلاً آگاہ کیا،سیمینار سے ڈسٹرکٹ چیئرمین ملک قائم الدین دہپال،ڈسٹرکٹ الیکشن کمشنر سبی محمد احسن،ڈسٹرکٹ الیکشن کمشنر لہڑی سکندرعلی جمالی،چیئرمین میونسپل کمیٹی حاجی دائود رند،جمعیت علماء اسلام کے امیر مولانا عطااللہ بنگلزئی،پشتونخوامیپ کے ضلعی معاون سیکرٹری احمد خان لونی،نہال خان لہڑی،ملک ریاض بلوچ،سید مقبول شاہ،رابیل جبار،مس نازش، رابعہ ،میر شہباز خان باروزئی،حاجی ریاض ندیم نیازی و دیگر نے بھی خطاب کیا،تقریب سے خطاب کرتے ہوئے مقررین نے کہاکہ جمہوریت کے استحکام کے لیے ووٹ کی اہمیت و افادیت کے بارئے میں عوام میں شعور و آگاہی لازمی ہے اور 18سال کی عمر کے نوجوانوں کو چاہیے کہ وہ اپنا قومی فریضہ پورا کرتے ہوئے اپنا ووٹ اندراج کرائیں جبکہ جمہوری عمل کو کامیاب بنانے کے لیے خواتین کی شرکت کویقینی بناتے ہوئے انہیں ووٹ کے استحقاق سے محروم نہ رکھا جائے اورخواتین کے ووٹ کو ووٹرفہرستوں میں اندراج کراکر ووٹ کے ٹرن آئوٹ میں اضافہ کیا جاسکتا ہے انہوں نے کہا کہ اگر کوئی شخص یہ سوچ کر ووٹ کا استعمال نہ کرئے کہ اس کے ایک ووٹ سے کسی قسم کی تبدیلی نہیں آنی ہے تو یہ جمہوری عمل کے لیے بہت بڑی نقصان دہ بات ہے انہوں نے کہاکہ آج پورئے ملک میں نیشنل ووٹر ڈئے منایا جارہا ہے جسکا بنیادی مقصد عوام میں ووٹ کی اہمیت کے بارئے میں ان کو آگاہ کرنا ہے جبکہ ایسے لوگ جن کا ووٹ تاحال فہرستوں میں اندراج نہیں تو وہ اپنے قریبی ضلعی الیکشن کمشنر آفس سے رابطہ کرکے اپنے ووٹ کے اندراج کو یقینی بنائیں جبکہ جن افراد کے نام فہرستوںمیں درست نہیں ہیں تو وہ 8300پر ایس ایم ایس بھیج کر معلومات حاصل کرسکتے ہیں اور اپنے نام کی درستگی کو نادرا سے یقینی بنائیں۔