وزیر خزانہ اسحاق ڈار او جی پی سمٹ میں شرکت کیلئے (کل) پیرس پہنچیں گے

پیرس ۔ (اُردو پوائنٹ اخبارتازہ ترین - اے پی پی۔ 05 دسمبر2016ء) وفاقی وزیر خزانہ و اقتصادی امور سینیٹر محمد اسحاق ڈار (کل) منگل سے تین روزہ سرکاری دورے پر فرانس پہنچیں گے۔ انہیں اس دورے کی دعوت فرانس کے وزیر برائے خارجہ امور اور حکومت برطانیہ نے او جی پی سمٹ میں ان کی نمائندگی کے لئے دی تھی جو کہ 6دسمبر تا 9 دسمبر 2016 سے فرانس کے دارالحکومت پیرس میں منعقد ہو رہی ہے۔

اس دورے کے دوران وہ اوپن گورنمنٹ پارٹنرشپ (او جی پی) سمٹ اور فرانس ایجنسی آف ڈویلپمنٹ (اے ایف ڈی) کی 75ویں سالگرہ میں بھی شرکت کریں گے جس کی میزبانی فرانس کے صدر فرانسکوس ہولاندے کر رہے ہیں۔ اس موقع پر وفاقی وزیر پاکستان کی ممبر شپ کیلئے لیٹر آف انٹنٹ فرانسیسی صدر کے حوالے کریں گے۔سمٹ کے دوران وفاقی وزیر ایک گول میز کانفرنس میں تقریر بھی کرینگے جس میں سمٹ میں پاکستان کی شرکت کے اغراض و مقاصد بیان کریں گے۔

(جاری ہے)

جس پر ستر ممالک کے نمائندے شفافیت اور احتساب کے اصولوں کو متعین کرنے اور حکومتی امور میں شہریوں کی شرکت کو یقینی بنانے کے بارے میں غور و خوض کرینگے۔ جو کہ اچھی حکمرانی اور او جی پی تنظیم کے رکن ممالک کیلئے سماجی اور اقتصادی ترقی کیلئے اہمیت رکھتی ہے۔ او جی پی ایک کثیر الجہتی تنظیم ہے جس کا قیام 2011 میں ہوا جس کا مقصد کھلی اور شفاف حکومت عوام کی شرکت کی مدد سے قائم کرنا ہے تاکہ عوام کی ترقی کو یقینی بنایا جاسکے اور رشوت ستانی کا خاتمہ کیا جاسکے۔ سینیٹر اسحاق ڈار سی ای او، فرنچ ایجنسی آف ڈویلپمنٹ، سی ای او، او جی پی، رینالٹ اور اینجی کی اتنظامیہ سے ملاقاتیں بھی کریں گے۔ اس کے علاوہ وفاقی وزیر فرانسیسی اور پاکستانی میڈیا سے بھی ملیں گے۔